Türkmenistan

Aşgabatdaky “Berkarar” söwda we dynç alyş merkezinde ilata mugt sowgat paýlamak boýunça gurnalan çärede basa-baslyk döredi. Bu ýagdaýlar barada Azatlyk Radiosynyň habarçysy 13-nji ýanwarda paýtagtdan maglumat berdi.

“12-nji ýanwarda Berkarar söwda we dynç alyş merkezinde dürli ýaşdaky adamlaryň, şol sanda çagalaryň onlarçasy, belki-de ýüzlerçesi üýşdi. Märekäniň üýşmegine söwda merkezinde ilata mugt sowgat paýlanjakdygy barada IMO we beýleki sosial ulgamlarda bildirişleriň ýaýradylmagy sebäp boldy” diýip, ýagdaýlardan habarly paýtagtly ýaşaýjy anonimlik şertinde gürrüň berdi.

Bu bildirişler geçen hepdäniň dowamynda söwda merkezinde dükanlary bar bolan telekeçileriň ençemesiniň sosial ulgamlaryndaky sahypalarynda yzly-yzyna paýlaşyldy.

Degişli maglumat

Marydaky nägilelikden soň, häkimiýetler telekeçilere lotereýa oýnuny gurnamagy gadagan edýär

“Bildirişde söwda merkezinde “Aýaz babany ugradyş” çäresiniň geçiriljekdigi, oňa hemmeleriň çagyrylýandygy we gelen adamlara mugt sowgat paýlanjakdygy aýdyldy” diýip, paýtagtly ýene bir ýaşaýjy anonimlik şertinde aýtdy.

Ýöne mugt sowgatlaryň çäkli möçberde paýlanmagy we ony almaga gelen adamlaryň aşa köp bolmagy, olaryň üstünde dawa-jenjeliň döremegine sebäp boldy.

“Söwda merkeziniň dürli ýerlerinde duran we Aýaz babanyň eşigini geýen üç adam bu ýerdäki telekeçileriň maliýeleşdirmeginde taýýarlanan sowgatlary paýlap başlady. Toplanan adamlar Aýaz babalaryň daşyny gabap, sowgat almaga howlukdylar. Her biriniň içinde 15 manatlyk süýji-kökeler bolan bu sowgadyň üstünde dörän basa-baslyk dag aşdy” diýip, ýaşaýjy şaýat bolan ýagdaýlaryny suratlandyrýar.

Aýaz babalardan biriniň öz golaýynda duran ýetginjege sowgat bermän, yzdaky durana berip, haltasyndaky sowgatlaryň barynyň gutarmagy bilen, ol sowgat ýetmän galan adamlaryň ençemesiniň şarpygyna sezewar boldy.

“Basa-baslyk polisiýa işgärleriniň gelmegi bilen dargadylyp, adamlaryň tenine dürli şikesleriň ýetmeginiň öňi alyndy” diýip, ýaşaýjy belledi.

Wakanyň bolan ýerinden Azatlyk Radiosyna gelip gowşan suratlarda adamlaryň onlarçasynyň Aýaz babanyň keşbindäki adamyň daşyna toplanandygyny we ellerini uzadyp ondan sowgat almaga çalyşýandygyny görse bolýar.

Azatlyk bu ýagdaýlar barada "10 ýyl Abadançylyk" we Atatürk köçeleriniň çatrygynyň günorta tarapynda ýerleşýän "Berkarar" söwda we dynç alyş merkeziniň administrasiýasyndan telefon arkaly teswir alyp bilmedi.

Degişli maglumat

Müňlerçe adamyň nägileliginden soň, lotereýa oýnunda satylan joraplaryň puly yzyna berilýär

Habarçymyz bilen anonimlik şertinde söhbetdeş bolan söwda merkezindäki telekeçileriň birnäçesi bu çäräniň gurnalmagyna dükanlarda alyjylyk ukybynyň peselmeginiň sebäp bolandygyny aýdýar.

“Soňky hepdelerde söwda juda peseldi. Adamlar diňe iň zerur bolan harytlaryny alyp gidýärler. Telekeçiler alyjylary söwda merkezine çekmek maksady bilen, merkeziň administrasiýasyna bu çäräni gurnamagy teklip etdiler” diýip, paýtagtly telekeçi anonimlik şertinde aýtdy.

Habarçymyz ýurtda ýedi ýyldan gowrak wagt bäri ýiti duýulýan ykdysady kynçylyklaryň arasynda, adamlaryň güzeran eklenjiniň ýaramazlaşýandygyny, arzan ýa-da mugt harytlara mätäçliginiň artýandygyny belleýär.

“Adamlar bir ýerde bir zadyň arzan satylýandygyny ýa-da mugt paýlanýandygyny eşitseler, onuň hiline we möçberine garamazdan, dessine şol ýere barýarlar. Bularda dawa-jenjeller, adamlaryň tenine dürli şikesleriň ýetmegi ýaly wakalar hem köp bolýar. Bu ýagdaýlar, ilatyň bolelin durmuşda ýaşaýandygy barada hökümetiň öňe sürýän syýasatyny aç-açan ýalana çykarýar” diýip, ýerli synçy anonimlik şertinde habarçymyza aýtdy.

Türkmen häkimiýetleri we mediasy ykdysady kynçylyklar we munuň ilata ýetirýän täsirleri barada aç-açan mesele gozgamaýar.

Degişli maglumat

Maryda aç adamlar bazardaky zibilden azyk gözleýärler

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Aşgabadyň häkimiýetleri welaýatlardan paýtagta gelip zähmet çekýän içerki migrantlara garşy göreşini ýene güýçlendirdi. Paýtagta barýan welaýat ýaşaýjylary saklanýar we ýazgyda duran ýerlerine ugradylýar. Bu ýagdaýlar barada Azatlyk Radiosynyň habarçysy 13-nji ýanwarda Mary welaýatyndan maglumat berdi.

“Şu günler gazanç gözleginde welaýatlardan Aşgabada baran adamlar paýtagtyň otly menziline baran badyna saklanýar we dessine soraga çekilýär” diýip, bu ýagdaýlary başdan geçiren maryly ýaşaýjy anonimlik şertinde aýtdy.

Polisiýa işgärleri zähmet migranty güman edilýän adamlardan näme üçin paýtagta gelendiklerini sorap, Aşgabatda wagtlaýyn ýazgyda durandygyny ýa-da işleýändigi baradaky kepilnamany görkezmegi talap edýärler.

Degişli maglumat

Aşgabatda daşary ýurt ýolbaşçylarynyň forumyna taýýarlyk ilata kynçylyk döretdi

“Men we başga-da ýedi sany işçi Täze ýyl baýramynda çagalarymyzyň ýanyna gidendigimizi, indem yzymyza ýene işlemäge gelendigimizi we öňden bäri paýtagtdaky hususy hojalyklarda gurluşyk, remont işlerini ýerine ýetirýändigimizi düşündirmäge synanyşdyk” diýip, maryly ýene bir işçi anonimlik şertinde aýtdy.

Bellesek, welaýatlardan paýtagta gelýän işçileriň köpüsi gurluşyklarda ýa-da hususy hojalyklardaky jaý abatlamak işlerinde günlükçi bolup zähmet çekýär. Bu işçiler wagtlaýyn ýazgy ýa-da işleýändigi baradaky kepilnama bilen üpjün edilmeýär.

“Biz zähmet çekýän hususy hojalygymyza jaň edip, polisiýa şol hojalykda işleýändigimizi hem düşündirjek bolduk. Ýöne olar muňa hem gulak asman, bizi polisiýa bölümine äkidip, irden düşenimizden öýlän sagat 5-e çenli aç-suwsuz sakladylar. Biz ýaly welaýatlardan gelen adamlary toplap, her bir sagatdan adam getirýärdiler. El telefonlarymyzy hem elimizden aldylar” diýip, maryly işçi belledi.

Bu ýagdaýlary başdan geçiren maryly zähmet migrantlarynyň ençemesiniň tassyklamagyna görä, polisiýa işgärleri saklanan we polisiýa bölümine eltilen welaýat ýaşaýjylaryny şol günüň agşamy yzyna, ýazgyda duran sebitine ugradýarlar.

“Meni we başga-da ençeme adamy diňe oturyp gaýdylýan ýörite wagona saldylar we ýanymyza hem öz welaýatymyzdan bolan polisiýa işgärlerini berkidip, yzymyza ugratdylar” diýip, maryly zähmet migranty belledi.

Degişli maglumat

Balkanabatda, Türkmenbaşyda ýazgyda durmadyk sürüjiler işden kowulýar

Welaýat ýaşaýjylarynyň tassyklamagyna görä, polisiýa işgärleri bu çäreleriniň sebäplerini “wagtlaýyn ýazgyda durandygy ýa-da işleýändigi baradaky kepilnamasy bolmadyk ýurt raýatlarynyň paýtagta girmeginiň häzirlikçe çäklendirilendigi” bilen düşündirýärler.

“Olar jikme-jike maglumat bermeýärler. Şeýle-de, çäklendirmäniň haçana çenli dowam etjekdigini hem aýtmaýarlar. Indi biz näme etmeli? Nädip maşgalamyzy eklemeli? Näme sebäpden welaýatyň adamlary paýtagta barmaly däl? Welaýatlarda iş bolsa, bizem Aşgabada baryp işlemezdik. Döwlet ýolbaşçylary bizi öz raýaty deňinde görmeýän bolsa ýollary açsyn, biz maşgalamyzy alyp daşary döwlete gitjek” diýip, maryly işçi belledi.

Türkmenistanda welaýat ýaşaýjylarynyň Aşgabada goýberilmezligi ýa-da paýtagtdan çykarylmagy bilen bagly ýagdaýlar ýylyň dowamynda birnäçe gezek ýüze çykýar. Bu ýagdaýlar köplenç uly baýramçylyklaryň ýa-da ýurtda geçirilýän halkara çäreleriniň öňüsyrasynda bolýar.

Azatlyk soňky ýagdaýlar we munuň näme bilen baglanyşyklydygy barada Aşgabadyň Polisiýa müdirliginden we otly menzilinden teswir alyp bilmedi.

Paýtagtda welaýatlylaryň anyklanyp, şäherden çykarylmagy boýunça reýdleriň geçirilýändigi barada Azatlygyň habarçylary soňky gezek geçen ýylyň oktýabrynda, Aşgabatda geçirilen halkara forumyň öňüsyrasynda habar beripdiler.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.