Azat Ýewropa/Azatlyk Radiosynyň maliýe üpjünçiligini kesmek boýunça amerikan häkimiýetleriniň alyp barýan tagallalaryna kazyýetde garalýan mahaly, Azatlyk Radiosynyň türkmen dilli diňleýjileri bu media guramasynyň metbugat azatlygy çäklendirilýän ýurtlarda, şol sanda Türkmenistanda demokratik gymmatlyklaryň şamçyragy bolandygyny aýdyp, medet beriji sözleri beýan etmegi dowam etdirýärler.
“Türkmenistanda döwlet eýeçiligindäki media serişdeleri diňe propaganda häsiýetli maglumatlary, diňe ýokardaky emeldarlaryň eşidesi gelýän täzelikleri berýärler. Azatlyk Radiosynyň habarçylary ýurtda bolup geçýän, ýöne emeldarlaryň eşidesi gelmeýän habarlary subutnamalary bilen ýaýlyma berýärler” diýip, bir türkmen dilli diňleýji aýdýar.
Birleşen Ştatlaryň prezidenti Donald Tramp 14-nji martda hökümet netijeliligini artdyrmak tagallalarynyň çäklerinde ýedi agentligiň, şol sanda Azat Ýewropa/Azatlyk Radiosy, Amerikanyň Sesi ýaly birnäçe halkara media serişdelerine gözegçilik edýän ABŞ-nyň Global Media Agentliginiň (USAGM) işini kanunda görkezilen minimuma çenli kemeltmek barada karara gol çekdi.
Bu kararyň yz ýany, agentligiň ýolbaşçylary Azat Ýewropa/Azatlyk Radiosynyň Kongres tarapyndan bölünip berlen hem-de tassyklanan grantynyň ýatyrylýandygyny mälim etdiler. Azatlyk Radiosy bu karara şikaýat bildirip, kazyýete ýüz tutdy.
Bu arza boýunça 24-nji martda Waşington Kolumbiýa okrugynda geçirilen kazyýet diňlenişiginiň öňüsyrasynda, agentligiň ýolbaşçylary grantyň bir böleginiň tölenjekdigini yglan etdiler. 26-njy martda bolsa, USAGM Azatlyk Radiosynyň grantynyň dolulugyna, ýöne bir şert bilen, ýagny mundan beýläk zerur hasaplan halatynda granty ýatyrmak hukugyny özünde saklap, dikeldilýändigini yglan etdi. Azat Ýewropa/Azatlyk Radiosy 2025-nji maliýe ýylyna degişli grantyň galan bölegini almak ugrunda kazyýet tagallalaryny dowam etdirýär.
“Azatlyk Radiosy erkin metbugatyň çäklendirilýän ýurtlarynda, diýdimzor ýurtlarda bolup geçýän wakalar barada ýyllarboýy habar berip gelýär. Şeýle habarlar bu ýurtlaryň döwlet gözegçiligindäki habar serişdelerinde berilmeýär” diýip, türkmenstanly okyjy aýdýar.
Olar Azatlyk Radiosynyň habarçylarynyň Türkmenistanyň içinde halkyň ýüzbe-ýüz bolýan kynçylyklary, olaryň resmi metbugatda aýdylmaýan ýaşaýyş-durmuş şertleri barada dogruçyl habar berýändiklerini, şeýle tagallalaryň bolsa, demokratik gymmatlyklara, halal žurnalistika, azat söze, hem-de erkin pikir alyşmalara şamçyrag, ýol görkeziji bolup hyzmat edýändigini aýdýarlar.
“Olar azat söze, adam hukuklarynyň goraglylygyna, ynsan mertebesiniň hormatlanylmgyna hem-de demokratik gymmatlyklara ynanýarlar” diýip, türkmenistanly synçy aýdýar.
Azat Ýewropa/Azatlyk Radiosy erkin metbugatyň çäklendirilýän ýurtlarynda auditoriýalary dogruçyl, ters meýilsiz we obýektiw habarlar bilen üpjün etmegi özüniň missiýasy hökmünde kesgitleýändigini aýdýar. Media guramasynyň sanlaryna görä, Azat Ýewropa/Azatlyk Radiosynyň habarlary 23 ýurtda, 27 dilde her hepde 50 million çemesi adama baryp ýetýär.
1950-nji ýylyň 4-nji iýulynda ‘demir perdäniň’ aňyrsynda ýaşaýan halkara radio ýaýlymlaryny ýetirip başlan media guramasy, erkin metbugatyň çäklendirilýän ýurtlarynda adamlary dogruçyl, senzurasyz habarlar we açyk çekişmeler bilen üpjün etmek arkaly demokratik gymmatlyklary wagyz edýändigini aýdýar.
“Azatlyk Radiosynyň habarçylary halkyň içinde bolup, olaryň kösençliklerini gözleri bilen görüp, bolup geçýän wakalar barada adamlara dogruçyl habar bermek ugrunda tagalla edýärler” diýip, türkmenistanly diňleýjiler aýdýar.
Mundan ozal, geçen hepdelerde erkin metbugatyň işi barada Azatlyk Radiosy bilen öz tejribelerini paýlaşan beýleki bir türkmenistanly öz atasynyň nädip onlarça ýyl bäri uly üns bilen Radionyň efirini diňleýändigini gürrüň berdi.
“Meniň atam her gün Azatlyk Radiosynyň gepleşiklerini diňlemek üçin, işlerini ir bilen dynyp, öz otagyna geçýär we hiç kimiň päsgel bermezligini sorap, Azatlyk Radiosyny diňleýär” diýip, şonda ýaş türkmenistanly gürrüň berdi.
Mundan öňki seslenmelerde türkmenistanly diňleýjiler bu radiostansiýanyň sada halkyň sesi bolandygyny aýtdylar. Olar ýurt içinde bar bolan haýsydyr bir problema Azatlyk Radiosynda gozgalandan soňra, häkimiýetleriň bu problemany düzetmek üçin herekete geçen pursatlarynyň köp bolandygyny aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum