Türkmenistanda prezident Serdar Berdimuhamedowyň aýal dogany, öňki prezident, häzir Halk maslahatynyň başlygy Gurbanguly Berdimuhamedowyň gyzy Oguljahan Atabaýewanyň resmi metbugatda has köp peýda bolup başlamagy, ilat arasynda dürli pikir alyşmalaryň döremegine getirdi. Bu ýagdaýlar barada Azatlyk Radiosynyň habarçylary 31-nji martda ýurduň dürli sebitlerinden maglumat berdiler.
“Türkmen metbugaty Berdimuhamedowlar maşgalasyndan birini telewideniýede uly planda görkezip başlasa, ähli zat düşnükli bolýar. Ýagny onuň ýakyn wagtda uly döwlet wezipeleriniň birini eýelejekdigi ikuçsyz. Köp adam onuň ýakyn wagtda Mejlisiň başlygy bolmagyna garaşýar” diýip, lebaply bir ýaşaýjy anonimlik şertinde aýtdy.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça ýerine ýetiriji direktory, wise-prezidenti Atabaýewa resmi metbugatda martyň başynda peýda bolup başlady. Ol syýasy çärelere gatnaşýar we beýleki döwletleriň wekilleri bilen duşuşýar.
Munuň bilen bir wagtda, soňky hepdelerde TikTok we Instagram ýaly sosial ulgamlaryň türkmen dilli sahypalarynda hem, hususan-da, hökümete ýakyn bloggerler tarapyndan Atabaýewanyň propagandasy ýaýbaňlandyrylýar. Onuň geçiren duşuşyklary, maslahatlary barada wideolar paýlaşylýar.
“Häzirlikçe adamlar bu wideolaryň aşagynda gorky astynda teswir ýazýarlar. Diktator maşgalasyna degişli wideolara erbet teswir ýazmak gowulyk bilen gutarmaýar” diýip, maryly bir ýaşaýjy anonimlik şertinde aýdýar.
Habarçylarymyzyň tassyklamagyna görä, köp adam bu işjeňligi “Gurbanguly ölmänkä öz çagalaryny hökümetiň esasy ýerlerinde oturtmak planyny ýerine ýetirýär” diýip häsiýetlendirýär.
“Oguljahany şu güne çenli tanaýan adam ýokdy. Ol ýene sähelçe wagtdan özüni we maşgalasyny şalyk dinastiyasyna öwürjege meňzeýär. Şu güne çenli Serdary prezidentlik wezipesine çenli her ýerde başlyk edip belläpdi. Bu gezek hem şol senariýa boýunça gyzyny ýokary wezipä belleýänçä “dürli syýasy işlerde” diýen adyny ýöretmek üçin häzirki tagallalary edýär” diýip, ahally ýaşaýjy anonimlik şertinde aýtdy.
Ilat, hususan-da, býujet işgärleriniň arasynda prezidentiň aýal doganynyň syýasy meýdanda işjeňleşmegine ýiti alada bildirýänler köp. Olar munuň ýurduň ykdysadyýetine has-da ýaramaz täsir etjekdigini aýdýarlar.
“Sebäbi Gurbangulynyň hem prezident bolan döwri ähli ýegenlerine telekeçilik biznesiniň açaryny berendigini ýatladyp, halkyň bir döwüm çörege mätäç galandygyny aýdýarlar. Eger şeýle ýagdaý gaýtalansa, onda halk bu maşgala sebäpli bolup biljek ykdysady kynçylyklara indi çydamaz” diýip, lebaply ýaşaýjy belleýär.
Ýurduň bilim ulgamyndaky çeşmelerimiz prezidentiň aýal doganynyň köpçülikde ýygy-ýygydan görkezilmegini hökümetiň "gender deňligini görkezmek" oýny hökmünde häsiýetlendirýärler.
"Bu, elbetde, syýasy oýun we ýurtdaky dünýewi, demokratik we hukuk döwletiniň iş ýüzünde dolulygyna depelenmegini aňladýar" diýip, paýtagtyň konserwatoriýasynyň aýal mugallymy we talyplary gürrüň berdiler.
Azatlygyň bu aýdylanlar barada Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyndan teswir almak synanyşyklary oňyn netije bermedi.
Soňky 18 ýyldan gowrak wagtyň dowamynda Türkmenistanda Berdimuhamedowlaryň şahsyýet kulty we maşgala kulty üznüksiz berkidilýär.
Mundan ozal, Türkmenistanyň metbugatynda prezident S. Berdimuhamedowyň we onuň kakasy, Halk maslahatynyň başlygy G.Berdimuhamedowyň propagandasy ýaýbaňlandyrylýardy. Resmi metbugat prezidentiň ejesiniň we enesiniň propagandasyny hem wagtal-wagtal güýçlendiripdi.
Merkezi Aziýa boýunça bilermen Brýus Panniýer 31-nji martda Azatlyk Radiosyna beren maglumatynda häzirki wagtda Atabaýewanyň şahsyýet kultunyň dabaralanmagyny “uly Berdimuhamedowyň oglunyň häkimiýetini berkitmek üçin gyzyny syýasy meýdana çykarýandygy” bilen düşündirdi.
Dünýäniň iň ýapyk we repressiw ýurtlarynyň biri hasaplanylýan Türkmenistanyň hökümeti adam hukuklaryny depelemekde, söz-metbugat azatlygyny bogmakda we beýleki esasy azatlyklary berk çäklendirmekde ýyllarboýy tankyt edilýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum