Türkmenistanda prezident Serdar Berdimuhamedowyň aýal dogany, öňki prezident, häzir Halk maslahatynyň başlygy Gurbanguly Berdimuhamedowyň gyzy Oguljahan Atabaýewa ýurduň syýasy sahnasynda we resmi metbugatynda has köp peýda bolup başlady. Atabaýewa syýasy çärelere gatnaşýar we beýleki döwletleriň wekilleri bilen duşuşýar.
Atabaýewa geçen ýylyň 7-nji dekabrynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça ýerine ýetiriji direktory, wise-prezidenti wezipesine bellenildi.
Şol aýyň 10-nda ol Türkmenistanyň “Magtymguly Pyragynyň 300 ýyllygyna” atly ýadygärlik (altyn we kümüş) nyşanlar toplumy we Türkmenistanyň “Arkadag” medaly bilen sylaglandy.
Resmi metbugat Atabaýewanyň syýasy ýoly, eýelän wezipeleri, nirede bilim alandygy ýa-da ýaşy barada ne ol agzalýan wezipä bellenende, ne-de gürrüňi edilýän baýraklar bilen sylaglananda kelam agyz maglumat berdi.
Şondan soň Atabaýewa üç aýlap resmi metbugatda tas görünmedi. Ýöne 5-nji martdan başlap, ol ýurduň habar beriş serişdelerinde ýygy-ýygydan peýda bolup başlady.
22-nji martda ol Arkadag şäherinde ählihalk bag ekmek çäresiniň ýazky möwsümine gatnaşdy. 25-nji martda bolsa, Atabaýewa Ministrler Kabinetiniň başlygynyň medeniýet ulgamyna gözegçilik edýän orunbasary hem-de ýurduň köpçülikleýin habar beriş serişdeleriniň zenan ýolbaşçylary bilen duşuşdy.
28-nji martda ol gaznanyň döredilmeginiň dört ýyllygy mynasybetli halkara maslahaty geçirdi. Munuň çäginde ol bu maslahata gatnaşmak üçin Aşgabada gelen Gazagystanyň, Özbegistanyň, Türkiýäniň, Gruziýanyň, Russiýanyň, Eýranyň we Hytaýyň wekilleri bilen duşuşdy.
Mundan başga-da, soňky hepdelerde TikTok we Instagram ýaly sosial ulgamlaryň türkmen dilli sahypalarynda hem, hususan-da, hökümete ýakyn bloggerler tarapyndan Atabaýewanyň propagandasy ýaýbaňlandyrylýar. Onuň geçiren duşuşyklary, maslahatlary barada wideolar paýlaşylýar.
Eýse, Atabaýewanyň syýasy meýdandaky we resmi metbugatdaky işjeňliginiň birdenkä ýygjamlaşmagy nämäni aňladyp biler?
Merkezi Aziýa boýunça bilermen Brýus Panniýer 31-nji martda Azatlyk Radiosyna beren maglumatynda muny Berdimuhamedowlar maşgalasyndan ýene bir agzanyň ýurduň syýasy sahnasyna goşulýandygynyň aýdyň nyşany hökmünde görüp boljakdygyny aýdýar.
Onuň sözlerine görä, G.Berdimuhamedowyň gyzyny, oglunyň “syýasy güýji saklamagyna” kömek etmek we muny pugtalandyrmak üçin, häkimiýetde haýsy-da bolsa uly bir wezipä bellemäge taýýarlyk görýändigi ikuçsyz.
“Ol [G.Berdimuhamedow] maşgalasynyň, oglunyň häkimiýetini berkitmäge çalyşýar. Ýöne munuň patriarhiýar jemgyýetde hakykatda näderejede başa barjakdygy ikuçly. Muny gelejekde göreris” diýip, Panniýer aýdýar.
Türkmenistanyň syýasy arenasynda bolup geçýän bu wakalar, dünýäniň ünsüniň Birleşen Ştatlarda Donald Trampyň ýanwar aýynda prezidentlige girişmegi bilen, bütindünýä täsir edip biljek üýtgeşmeleriň girizilip başlanmagyna gönügen mahalyna gabat gelýär.
Panniýeriň pikiriçe, awtoritar hökümetleriň ählisi dünýäde şeýle wakalar dowam edýän mahaly, özleriniň amala aşyrýan syýasy öwrülişikleriniň hiç kimiň ünsüni çekmejekdigini gowy bilýärler we pursatdan peýdalanyp, herekete geçýärler.
“Olar şu pursatda öz syýasy maksatlaryny ýerine ýetirýärler. Sebäbi olar häzirki pursatda muny hiç kimiň tankyt etmejekdigini bilýärler” diýip, bilermen belledi.
Ýatlatsak, Serdar Berdimuhamedowyň döwlet başyna geçmegi hem, dünýäde we regionda ýiti wakalaryň bolup geçýän döwrüne gabat gelipdi. Şol döwür regionyň we dünýäniň ünsi Gazagystanda dörän zorlukly tolgunyşykda we Russiýanyň birdenkä Ukraina çozuş etmeginde bolupdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum