Türkmenistan

Maryda kanun goraýjy edaralar ten satmak bilen meşgullanýan zenanlara garşy geçirýän reýdleriniň gerimini güýçlendirdiler.

Bu çäreler şugundyr ýygnamak möwsüminiň başlanmagy bilen baglanyşykly bolup, saklanan zenanlar şugundyr meýdanlaryna iberilýär. Bu ýagdaýlar barada Azatlyk Radiosynyň habarçysy 28-nji noýabrda sebitden maglumat berdi.

“Şu günlerde polisiýa işgärleri ten satýan gelin-gyzlary gözläp, olary yzarlaýarlar. Soňra olara garşy reýdler geçirilip, zenanlar tussag edilýärler. Bu reýdleriň gerimi tutuş welaýatda güýçlendi” diýip, ýerli polisiýa bölümleriniň birindäki çeşmämiz gürrüň berdi.

Degişli maglumat

Maryda býujetçileriň hasabyna şugundyr ýygnalýar

Polisiýa işgärleriniň birnäçesiniň anonimlik şertinde habarçymyza aýtmagyna görä, reýdleriň gerimini güýçlendirmek barada “ýokardan ýörite görkezme gelip gowşupdyr”.

“Görkezmede ten satmak bilen meşgullanmakda saklanyp, polisiýa bölümlerine getirilen aýal-gyzlaryň garşysyna administratiw düzgün bozandygy barada iş gozgalmalydygy aýdylýar” diýip, başga bir polisiýa işgäri belledi.

Onuň tassyklamagyna görä, munuň netijesinde, bu zenanlar temmi çäresi hökmünde 10 günlük şugundyr meýdanlaryna äkidilýär we ol ýerde şugundyr ýygnamaga mejbur edilýärler.

“Ýolbaşçylar mugt el güýji gerek diýýärler” diýip, polisiýa işgäri aýtdy.

Azatlyk ýokarda beýan edilen ýagdaýlar barada welaýatyň degişli häkimiýetlerinden, şol sanda Polisiýa müdirliginden teswir alyp bilmedi.

Ýöne bu maglumat, sebitde gant şugundyrynyň hasylyny ýitgisiz ýygnap almak babatda degişli işleriň alnyp barylýandygy hakda welaýat häkiminiň beren hasabatyndan sanlyja gün soňa gabat geldi.

Mary welaýatynyň häkimi Begençmyrat Orazow ýurduň sebitlerinde we oba hojalyk toplumynda alnyp barylýan işlere bagyşlanyp, 25-nji noýabrda geçirilen iş maslahatynda gant şugundyryny kabul ediş nokatlarynda bökdençsiz kabul etmek we bu möwsümi öz wagtynda geçirmek boýunça degişli işleriň alnyp barylýandygy barada hem prezidente hasabat berdi.

Degişli maglumat

Balkanda dynç alyşdaky býujetçiler ekin meýdanlaryna äkidilýär

Ýöne sebit resmisi, adatça bolşy ýaly, bu işleriň jikme-jiklikleri barada aç-açan maglumat bermedi.

Türkmenistanda soňky on ýyllykda şugundyr we ýeralma ýaly oba hojalyk ekinleri hem döwlet tabşyrygyna girizildi.

Ýurtda gant şugundyry esasan Mary we Balkan welaýatlarynda ýetişdirilýär we onuň hasyly güýz aýlarynyň ahyrynda ýygnalyp alynýar. Bu ýylky göz öňünde tutulýan şugundyr hasyly barada resmi çeşmelerde maglumat göze ilmeýär.

Türkmenistanda şugundyr hasylynyň býujet işgärleriniň, esgerleriň, okuwçylaryň we köçe-ýol hereketiniň düzgünlerini bozan raýatlaryň hasabyna ýygnalýandygy barada Azatlyk mundan ozalky ýyllarda hem ençeme gezek maglumat beripdi.

Türkmenistan oba hojalyk pudagynda mejbury zähmetden peýdalanmakda adam hukuklaryny goraýjy halkara guramalary tarapyndan yzygiderli tankyt edilýär. Ýöne hökümet resmileri bu tankytlara aç-açan jogap bermeýärler.

Resmi habara görä, şugundyr hasyly ýurtda şeker we dürli gant önümlerini taýýarlaýan ýeke-täk kärhanada "Maryşeker" açyk görnüşli paýdarlar jemgyýetinde işlenip taýýarlanylýar.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Aşgabatdan Moskwa uçar biletleriniň "näresmi" söwdasy gyzyşyp, biletleriň bahasy gymmatlaýar. Raýatlar biletleriň döwlet bahasynyň üstüne ýene şonça mukdarda para bermäge mejbur bolýarlar. Munuň bilen bir wagtda, “Türkmenistan” howaýollarynyň kassalarynda we websaýtlarynda bilet tas tapdyrmaýar.

“Häzir Aşgabatdan Moskwa uçar bilediniň resmi bahasy takmynan 250 dollara deň. Ýöne raýatlar bu biledi satyn almak üçin onuň üstüne ýene azyndan 250-300 dollar para bermeli bolýarlar” diýip, ýagdaýlardan habarly aşgabatly ýaşaýjy anonimlik şertinde Azatlyk Radiosynyň paýtagtdaky habarçysyna gürrüň berdi.

Degişli maglumat

Ýokary okuwa barýan ýedi talyp Aşgabadyň aeroportunda Russiýa goýberilmedi

Habarçymyz, şeýlelik bilen, türkmen howaýollarynyň Moskwa uçar biletleriniň nyrhlarynyň Russiýanyň “S7” kompaniýasynyň bu ugur boýunça biletleriniň bahasy bilen deňleşendigini aýdýar.

“S7-niň ekonom-klas üçin bir biledi takmynan 650 dollar bahalanýar. Ýöne bu biletler hem köplenç tapdyrmaýar. Kompaniýanyň biznes-klas biletleri 1 müň dollara golaýdan satylýar” diýip, ýerli ýaşaýjy belledi.

Aşgabatdan Moskwa uçuşlary häzirki wagtda diňe “Türkmenistan” we "S7" awiakompaniýalary amala aşyrýarlar.

Habarçymyz türkmen howaýollarynyň uçar biletlerini ýokary bahadan hem satyn almagyň gaty kyndygyny, satuwda tas tapdyrmaýandygyny belleýär.

Onuň tassyklamagyna görä, kassalarda bilet satyn almak mümkinçiligi tas ýok. Biletleri diňe tanyş arkaly ýa-da para berip, alyp bolýar.

“Biletleri onlaýyn satyn almagyň göz öňünde tutulandygyna garamazdan, ondan iş ýüzünde peýdalanmak elýeterli däl. Olar belli bir usul bilen satuwa çykarylýar. Muny hemmeler bilýär” diýip, ýerli ýaşaýjy belledi.

Azatlyk 28-nji noýabrda “Türkmenistan” howaýollarynyň resmi websaýtyndan onlaýyn bilet satyn almaga çalyşdy. Ýöne saýtda bu ugur boýunça 28-nji noýabr bilen 16-njy dekabr aralygynda gözlenen biletlere “Hormatly ýolagçy siziň saýlan uçuş ugruňyz boýunça awiabilet tapylmady!” ýa-da “Ýer ýok” diýen netijeler görkezildi.

Häzirki wagtda, paýtagtyň bilet satylýan kassalarynda nobata durýan raýatlar birek-biregi bilen öz tejribelerini paýlaşýarlar. Olaryň käbiri Özbegistandan Moskwa uçmagyň has arzana düşýändigini aýdýar.

Degişli maglumat

Aeroportdaky bilet kassalary uçar biletleriniň söwdasynda 'araçylardan peýdalanýar, para alýar'

“Taksi ýa-da awtobus bilen Lebaba ýa-da Daşoguza gidip, ol ýerden Buhara ýa-da Ürgenje baryp, bu ýerden hem Moskwa uçmak has arzan düşýär. Ýöne bu şeýle köp güýç talap edýär. Sebäbi ýolagçy 24 sagatdan gowrak, käte 48 sagat ýolda bolmaly bolýar. Sebäbi hiç kime birinji sutkada Moskwa uçup biljekdigine kepil geçilmeýär” diýip, ýagdaýlardan habarly paýtagtly ýaşaýjy anonimlik şertinde aýtdy.

Azatlyk türkmenistanlylaryň Özbegistanyň üsti bilen Russiýa, Hindistana, Türkiýä we beýleki ýurtlara gidip gelýändigi barada ençeme gezek maglumat berdi.

Emma şu ýylyň awgustynda Özbegistana we bu goňşy ýurduň üsti bilen başga ýurtlara syýahat edýän türkmen raýatlarynyň gury-ýer serhedinden geçmekde kynçylyk çekýändigi barada hem habarlar gelip gowuşdy.

Azatlyk ýokarda beýan edilen ýagdaýlar barada “Türkmenistan” awiakompaniýasyndan teswir almaga synanyşdy. Ýöne redaksiýa onuň resmi websaýtynda görkezilen telefon belgisine yzygiderli jaň edip, habarlaşyp bilmedi.

Türkmenistanlylar Russiýa köplenç okamak, pul gazanmak we bejergi almak üçin gidýärler, olaryň arasynda hemişelik göçüp gidýänler hem bar.

Azatlyk Türkmenistandan Russiýa gitmek üçin uçar biletleriniň uly kynçylyklar bilen tapdyrýandygy, raýatlaryň bilediň döwlet bahasynyň üstüne para bermeli bolýandygy barada soňky bir ýyldan gowrak wagtyň dowamynda ençeme gezek maglumat berdi.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.