Şu günler Türkmenistanda Ilatyň we ýaşaýyş jaý gorunyň uçdantutma ýazuwy dowam edýän mahaly, Lebap welaýatynyň ýaşaýjylary hususy ýaşaýyş jaýlaryna degişli döwlet belligi baradaky talaplaryň güýçlenýändigini aýdýarlar. Adalat ministrliginiň ýerli edarasynda ýaşaýyş jaýlaryny döwlet belligine aldyrmak isleýän raýatlaryň uly nobatlary emele gelýär.
Türkmenistanyň Adalat ministrliginiň ýanyndaky “Gozgalmaýan emläge bolan hukuklaryň we onuň bilen bagly geleşikleriň döwlet tarapyndan bellige alynmagy baradaky gullugy” gozgalmaýan emläkleri, şol sanda ilatyň hususy ýaşaýyş jaýlaryny döwlet belligine alýar. 2015-nji ýylda döredilan edara ýaşaýyş jaýynyň Bellige alyş kitabyny berýär.
Adalat ministrliginiň ýerli edarasyndan Bellige alyş kitabyny almak üçin birnäçe resminama, şol sanda Döwlet namasy talap edilýär.
Döwlet ýer kadastry hakynda Türkmenistanyň kanuny Döwlet namasyny “ýer bölegine eýeçilik hukugyny, ýa-da ýerden peýdalanmak hukugyny belleýän” resminama hökmünde kesgitleýär.
Adalat ministrliginiň gozgalmaýan emläkleri hasaba alyş edarasynyň websaýtyna görä, ýer böleginde gurlan ýaşaýyş jaýyna bolan eýeçilik hukugynyň döwlet tarapyndan bellige alynmagy üçin şu aşakdaky resminamalar talap edilýär:
- Arza (eýesi ýa-da onuň wekili tarapyndan);
- Pasport;
- Ýer bölegini bermek barada häkimiň karary;
- Ýer serişdeleri edaralarynyň resminamalary (Döwletnama, Şahadatnama);
- Tehniki tükelleýiş edarasynyň resminamalary (Obýektiň tehniki pasporty);
- Ýaşaýyş jaýy ulanmaga kabul etmek barada Döwlet kabul ediş toparynyň resminamasy;
- Hukuk belleýji resminama (satyn almak-satmak, sowgat etmek şertnamasy we ş.m.);
- Bellenen möçberlerde tölegleriň tölenendigi barada resminama;
Azatlyk Radiosynyň çeşmeleri hem hususy ýaşaýyş jaýlaryny döwlet belligine aldyrmak üçin Içeri işler ministrliginiň Ýangyna garşy gullugyndan, Welaýat binagärlik müdirliginden, Gaz üpjünçilik edarasyndan, Oba hojalyk ministrliginiň Ýer serişdeleri gullugyndan, Öý dolandyryş edarasyndan hem-de şäher häkimliginden dürli görnüşli kepilnamalaryň talap edilýändigini aýdýarlar.
Çeşmelerimiz şu günler Gozgalmaýan emläk gullugynyň ýerli edarasyndan resminama almak üçin barýan raýatlaryň örän köpdügini aýdýarlar.
“Ilkibaşda, nobata ýazylmaly. Dört-bäş gün aralykda nobatyň ýetýär” diýip, bir lebaply ýaşaýjy aýdýar.
Lebaply ýaşaýjylar Gozgalmaýan emläk gullugynyň ýerli edarasynda hususy ýaşaýyş jaýlaryny döwlet belligine alyş işleriniň haýal alnyp barylýandygyny aýdýarlar.
“Ýygnan dokumentleriňden hökman bir problema tapýarlar. Ol dokumentdiň bolanok, bu kepilnamaň bolanok diýip, yzyňa gaýtaryp goýberýärler” diýip, lebaply ýaşaýjylar aýdýarlar.
Bu aralykda, Azatlyk Radiosynyň çeşmeleri Adalat ministrliginiň ýerli edarasynda zerur bolan resminamalary düzetmek işlerini “çaltlandyrmak we aňsatlaşdyrmak üçin”, para soralýandygyny aýdýarlar.
Bir lebaply ýaşaýjy Gozgalmaýan emläk gullugynyň ýerli edarasynda 8-10 müň manat aralygynda para bilen zerur bolan resminamalary aňsat düzedip bolýandygyny aýdýar.
“Puluň bolsa, kepilnama ýygnap azara galmak gerek däl” diýip, bir ýerli ýaşaýjy Azatlyk Radiosynyň habarçysyna gürrüň berdi.
Azatlygyň çeşmeleri para bermezden, döwlet namasyny almak üçin onsuzam üç müň manada çenli çykdajy edilýändigini aýdýarlar.
“Döwlet namasyny almak üçin özüň ylgasaň, üç müň manada çenli çykdajy etmeli bolýar we iki aý töweregi wagt talap edýär” diýip, has ozal şeýle tejribeleri başdan geçiren bir lebap ýaşaýjysy aýdýar.
Şol bir wagtda, Azatlyk Radiosynyň çeşmeleri köne jaýlary döwlet belligine aldyrmagyň täze salnan mellek jaýlaryny döwlet belligine aldyrmakdan has aňsatdygyny aýdýarlar.
“Hiç hili [döwlet edarasynyň] karary bolmazdan bina edilen jaýlara döwlet namasyny almak üçin üç aý gerek” diýip, Azatlyk Radiosynyň çeşmesi gürrüň berdi.
Azatlyk Radiosy Türkmenistanda ilatyň ýaşaýyş jaýlaryny edinmekde ýüzbe-ýüz bolýan problemalary barada yzygiderli habar berýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum