Türkmen häkimiýetleri pandemiýanyň başyndan bäri watanyna dolanyp bilmeýän türkmenistanlylaryň ýene 300-e golaýyny ýurda getirdiler. Türkiýäniň Stambul şäherinden ugrap, Lebap welaýatynyň dolandyryş merkezi Türkmenabat şäheriniň aeroportuna gonan uçardaky ýolagçylar dessine karantine ýerleşdirildi. Bu waka watanyna dolanmak isleýän onlarça türkmenistanlynyň Stambulyň aeroportunda garaşmagy dowam etdirýän mahalyna gabat geldi. Bu barada Azatlyk Radiosynyň Türkmenadabyň aeroportundaky we Stambuldaky çeşmeleri habar berdiler.
"17-nji awgustda giçlik sagat 7:50 töwereginde Türkmenabada Boeing 777 kysymly uçar gondy. Stambuldan gelen bu uçarda 300-e golaý türkmenistanly ýurda dolandy" diýip, çeşmämiz aýtdy.
Onuň sözlerine görä, ýolagçylar uçardan düşen badyna, goş-golamlary berlenden soň, Amyderýanyň sag kenarynda ýerleşýän Türkmenabadyň baş karantin zonasyna ýerleşdirildi. Olar bu ýerde üç gün karantinde saklanýarlar.
Bu waka türkmen raýatlarynyň onlarçasynyň, käbir günlerde ýüzlerçesiniň Türkmenistana dolanmak umydy bilen, Stambulyň aeroportunda garaşmagyny dowam etdirýän mahalyna gabat geldi.
18-nji awgustda Stambul aeroportunda bolan çeşmelerimiz onlarça türkmenistanlynyň oturgyçlarda oturandygyny ýa-da ýatandygyny gürrüň berdiler.
"Aeroportdaky türkmenleriň köpüsiniň ýüzünden olaryň örän ýadawdygyny görse we aňsa bolýar. Käbir adamlar goş-golamlaryny ýassyk edinip, oturgyçlarda uklap galypdyrlar. Halkymyzy şu ýagdaýda göreniňde örän haýpyň gelýär" diýip, çeşmämiz aýtdy.
Türkmen häkimiýetleri pandemiýanyň başynda ýatyran halkara uçar gatnawlaryny heniz hem doly derejede dikeltmediler. Häzirki wagtda “Türkmenistan” awiakompaniýasy Dubaý (BAE), Kazan (Tatarystan) we Moskwa (Russiýa) ugurlary boýunça dowamly uçar gatnawlaryny amala aşyrýar. Ýöne häkimiýetler beýleki ýurtlara, hususan-da türkmenleriň has köpdügi aýdylýan Türkiýe ugry boýunça adaty uçar gatnawlaryny henizem dikeltmeýärler.
Soňky aýlarda türkmen häkimiýetleriniň wagtal-wagtal gurnaýan çarter uçarlaryna münmegi umyt edip, Stambulyň aeroportuna üýşýän türkmenistanlylaryň sany göz-görtele artdy. Käbir türkmenler birnäçe aýlap şol ýerde galýarlar. Iýul aýynyň başyndan bäri bu ýerdäki türkmenler Türkmenistana yzygiderli uçar gatnawlarynyň dikeldilmegini talap edip, birnäçe gezek protest bildirdiler.
Bu protest çäreleriniň yz ýany, türkmen häkimiýetleri daşary ýurtlarda, şol sanda Türkiýede galan raýatlaryny watana getirmek ugrundaky tagallalaryny birneme güýçlendirdiler.
Şu hepdäniň başynda häkimiýetleriň Belarusda we Täjigistanda okuwyny tamamlan türkmen studentleriniň 400-e golaýyny ýurda getirendigi mälim boldy.
Türkmenabadyň aeroportundaky başga bir çeşmämiz soňky bir hepdäniň dowamynda Türkmenistana gury ýer we howa ýollary arkaly getirilen raýatlaryň sanynyň 1500-den aşandygyny habar berýär.
Şeýle-de, ol sentýabr aýyndan başlap daşary ýurtdan gelen ýolagçylary karantine ýerleşdirmek düzgüniniň ýatyrylmak ähtimallygy barada aeroportuň resmileri derejesinde gürrüň gozgalýandygyny hem aýtdy.
"Ýolagçylardan test alyp, öýlerine goýbermek göz öňünde tutulýar. Şeýle-de, sentýabrdan daşary ýurtlardan gelýän uçarlaryň Aşgabadyň halkara aeroportuna gonup başlajakdygy barada hem gürrüň edilýär. Ýöne bular häzirlikçe diňe gürrüň bolmagynda galýar" diýip, çeşmämiz 18-nji awgustda aýtdy.
Türkmen häkimiýetleri we media serişdeleri daşary ýurtlarda galan müňlerçe türkmenistanlynyň ykbaly barada asla maglumat bermeýärler. Häkimiýetler Azatlygyň bu baradaky soraglaryny hem jogapsyz goýýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum