2-nji oktýabrda ir bilen Aşgabadyň Atamyrat Nyýazow şaýolunyň ugrunda üç ýeňil awtoulagyň gatnaşmagynda ýol-ulag hadysasy boldy. Wakada iki adam heläk boldy.
Deslapky barlaglara görä, şaýol bilen Görogly köçesiniň çatrygyna golaý aralykda bolan ýol heläkçiligine, ýeňil awtoulaglaryň biriniň ýokary tizlikde sürülmegi sebäp bolupdyr.
2010-njy ýylda öndürilen BMW kysymly awtoulag sagatda 135 kilometr tizlik bilen öňden barýan Jeep kysymly awtoulagy ozup geçmekçi bolanda, onuň çep gapdalyndan urýar. Jeep sag tarapa agdarylýar, onuň yzyndan gelýän Toýota Camry kysymly ýeňil awtoulag hem Jeep ulagynyň yzyndan baryp urýar. Netijede, Jeep ulagynyň sürüjisi we Toýoto ulagyndaky bir ýolagçy wakanyň bolan ýerinde agyr ýaralanyp, heläk bolýar.
Ýol heläkçiligindäki adam pidalary we ýaralanan adamlar barada başga jikme-jik maglumat berilmeýär.
Bu ýol-ulag hadysasy Türkmenistanda sentýabr aýynda geçirilen “ýol howpsuzlygynyň” biraýlygynyň edil yz ýany boldy.
Ýokary tizlikdäki BMW ulagy iki ugurly şaýoluň bölüji zolagyndaky arça agaçlaryna, güllere, ýol yşyklyndyryş sütünine we iki sany ýol belgisine-de zyýan ýetiripdir. Şäher häkimiýetleri ilkinji nobatda BMW ulagynyň sürüjisine ýoluň ugrundaky agaçlara, güllere, yşyklandyryş sütünlerine we ýol belgilerine ýetirilen zyýan üçin ýüzlerçe müň manat möçberinde jerime töleginiň ýazyljakdygyny duýdurypdyrlar.
Wakanyň şaýatlary şäher häkimiýetleriniň esasan ýol gyralaryndaky beton erňeklere, yşyklandyryş çyralaryna, arça agaçlaryna we güllere ýetirilen zyýanyň öweziniň dolunmagy ugrunda birinjilik bilen tagalla edýändiklerini aýdýarlar.
BMW ulagy bölüji zolakdan aşyp, garşy tarapa-da geçipdir, ýöne garşy hereketden gelýän ulaglara zyýan ýetmändir.
Azatlyk Radiosyna wakanyň bolan ýerinden gelip gowşan suratlarda ýol hadysasyna uçran ak reňkli BMW kysymly ýeňil awtomobil ulagyny görmek bolýar. Ulagyň öň tarapyna zyýan ýetipdir. Şeýle-de, suratlarda bölüji zolakdan asfalt ýola tarap ýykylan arça agajyny we awtoulagyň yz tarapynda bolsa bir tarapa çala eglen uly yşyklandyryş sütünini görmek bolýar. Suratlar ýeňil awtoulag heniz wakanyň bolan ýerinden alnyp gidilmänkä, hem-de gün sähel asmana göterilip, ýöne heniz guşluga galmanka düşürilipdir.
Polisiýanyň ýol gözegçiligi gullugy Türkmenistanda adam pidalaryna getirýän ýol-ulag hadysalary barada hasabat bermeýär. Içeri işler ministrligi ýol heläkçilikleri barada hasabat çap etmeýär. Döwlet gözegçiligindäki media serişdeleri hem ýol hadysalaryny agzamaýar.
Azatlyk Radiosynyň habarçylary adam pidalaryna getirýän köçe-ýol hadysalary barada yzygiderli habar berýärler.
Şu ýylyň özünde diňe Azatlyk Radiosynyň habar beren 12 çemesi ýol-ulag hadysalarynda ýurt boýunça azyndan 35 adam heläk boldy. Ýylyň dowamynda köp sanly ulag heläkçilikleri sebitleriň arasyndaky iri magistrallarda bolup geçdi.
Türkmenistanda bolýan ýol hadysalaryna sürüjileriň ýol hereketiniň düzgünlerini berjaý etmezligi, şol sanda ýokary tizlikde sürmegi we awtoulaglaryň tehniki näsazlygy ýaly ýagdaýlar bilen birlikde awtomobil ýollarynyň ýaramazlygy hem sebäp bolýar.
Azatlyk Radiosy Aşgabadyň Atamyrat Nyýazow şaýolunyň ugrunda bolan ýol-ulag hadysasy boýunça Polisiýanyň ýol gözegçiligi gullugyndan kommentariýa alyp bilmedi.
Türkmenistanda 1-nji sentýabr – 30-njy sentýabr aralygynda “ýol hereketiniň howpsuzlygy – ömrümiziň rahatlygy” atly biraýlyk geçirildi. Biraýlygyň dowamynda Polisiýanyň ýol gözegçiligi gullugynyň işgärleriniň köçelerdäki işjeňligi ýokarlandy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum