Ýewropa Bileleşiginiň liderleri dowam edýän ýaraşyk gepleşikleriniň arasynda, Russiýanyň Günbatar ýaraglarynyň Kiýewe berilmegini bes etdirmäge çalyşýandygyna garamazdan, Ukrainany harby taýdan goldamagy dowam etdirjekdigini wada berýär.
Bileleşigiň liderleri 20-21-nji martda Brýusselde duşuşýar. Sammitiň netijesinde “Ýewropa Bileleşigi özüniň 'güýç bilen parahatçylyk' çemeleşmesini saklap galýar, bu çemeleşme Ukrainanyň, zerur serişdeler hökmünde öz kuwwatly goşuny we goranyş mümkinçilikleri bilen, mümkin boldugyndan güýçli pozisiýada bolmagyny talap edýär” diýip, beýanatyň kabul edilmegine garaşylýar.
Azat Ýewropa/Azatlyk Radiosynyň gören tekstinde topar “birmeňzeş pikirdäki hyzmatdaşlar we ýaranlar bilen utgaşyklykda, mundan beýläk-de, Russiýanyň agressiýa urşuna garşy öz-özüni goramak hukugyndan peýdalanýan Ukrainany hem-de onuň halkyny köpugurly goldaw bilen üpjün etmegi dowam etdirer” diýýär.
Brýussel duşuşygy ABŞ prezidenti Donald Tramp bilen rus prezidenti Wladimir Putiniň telefonda gürleşip, energetika desgalaryna hüjüm etmegi 30 gün möhlet bilen bes etmek barada ylalaşylmagyndan soňra bolup geçýär.
Ýöne bu telefon söhbetdeşliginden bary-ýogy birnäçe sagat soňra, döwlet eýeçiligindäki “Ukrain demirýollary” özüniň Dnipropetrowsk sebitindäki demir ýol ulgamyna birikdirilen energetika desgasynyň rus dronlary tarapyndan nyşana alnandygyny aýtdy.
ÝB goşunlarynyň iberilmegi
Ýewropa Bileleşiginiň beýanaty adatça Bileleşigiň 27 agzasy tarapyndan biragyzdan kabul edilmeli, ýöne anonimlik şertinde gürrüňdeş bolan bir ÝB diplomaty Kreml boýunça öňden bäri ylalaşyk ýoluna eýermegi teklip edip gelýän Wengriýanyň bu karara goşulmazlygy saýlap almakçy bolýandygyny aýtdy. Şu aýyň dowamynda geçirilen beýleki bir ýygnakda hem şeýle bolupdy.
ÝB ýurtlary Saud Arabystanynda geçirilen gepleşiklerden şu wagta çenli çetde tutulyp gelinýär, ýöne resminamada “Ýewropa Bileleşigi we Agza Döwletler parahatçylyk prosesine goşant goşar hem-de Ukraina boýunça durnukly parahatçylygyň gazanylmagyna ýardam berer, bu tutuşlygyna alnanda Ukrainanyň-da, Ýewropanyň-da bähbidine bolup durýar” diýilýär.
Ýöne, gepleşiklere ÝB wekiliniň bellenmegi barada gürrüň gozgalmaýar. Brýusselde mundan ozal Germaniýanyň öňki kansleri Angela Merkeliň hem-de Finlýandiýanyň häzirki prezidenti Aleksandr Stabyň şeýle wezipä hödürlenip bilinjekdikleri barada gürrüňler bolup geçdi.
Beýanatyň tekstinde bolup biljek ýaraşyk ylalaşygyna gözegçilik etmek maksady bilen Ukraina ÝB goşunlarynyň iberilmegi bilen bagly ýagdaýlar agzalmaýar. Fransiýanyň prezidenti Emmanuel Makron mundan ozal şeýle teklibi gaýta-gaýta goldap çykyş edipdi, Moskwa muňa garşy çykýar.
Brýussel Tramp administrasiýasynyň Moskwanyň parahatçylyk ylalaşygyna ygrarly galmagyny gazanmak maksady bilen ileri sürýän iki meselesi boýunça öz pozisiýasyny saklap galýar; olaryň birisi – Kremle garşy sanksiýalaryň gowşadylmagy, beýlekisi bolsa – uruş jenaýatlary boýunça hasabatlylyk.
Bileleşik Ukraina garşy giň gerimli çozuş üç ýyl ozal başlanaly bäri 2400 kompaniýa hem-de adamlara, şol sanda Putine garşy öz güýjünde saklap gelýän wiza gadaganlygynyň hem-de olaryň aktiwleriniň doňdurylmagynyň möhletini ýaňy-ýakynda uzaltdy.
Ýewropa Bileleşigi täze sanksiýalar arkaly hem-de häzirki çäreleriň ýerine ýetirilmegini güýçlendirmek bilen Russiýa garşy basyşy güýçlendirmäge taýýar bolmagynda galýar” diýip, Bileleşik aýdýar.
Häzirki wagtda umumy bahasy 200 milliard ýewro çemesi bolan rus aktiwleri doňdurylmagynda galýar, olaryň esasy bölegi Belgiýadadyr. “Russiýa Ukraina garşy alyp barýan agressiýa urşuny bes edýänçä hem-de ýetiren zyýanynyň öwezini dolýança” bu maliýe serişdeleri petik astynda galar.
Agza döwletler “Russiýanyň Ukraina garşy agressiýa urşy bilen bagly baş goşulan uruş jenaýatlary boýunça hem-de beýleki iň agyr jenaýatlar boýunça hasabatlylyk” talap edýär.
Biraz öň, Waşington Ukraina garşy Agressiýa jenaýatyny jogapkärçilige çekmek boýunça Halkara merkezden çekilmek niýetini mälim etdi. Bu topar uruş jenaýatlaryndan jogapkär adamlar boýunça subutnama toplamak maksady bilen 2022-nji ýylda Günbatar ýurtlary tarapyndan döredildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum