ABŞ kazyýeti Azat Ýewropa/Azatlyk Radiosynyň ABŞ-nyň Global Metbugat Gullugyna (USAGM) garşy Azatlyk Radiosynyň kongres tarapyndan berlen maliýe serişdeleriniň kesilmegi bilen bagly eden şikaýat işindäki wagtlaýyn çäklendirme buýrugy talabyny (TRO) kanagatlandyrdy.
ABŞ-nyň Waşington şäherindäki okrug kazyýeti 25-nji martda çykaran kararynda agentligiň Azatlyk Radiosynyň grantyny ýatyrmak üçin "esassyz we gödeňsi" hereket edendigini, eger amala aşyrylsa, bu hereketleriň neşire "düzedip bolmajak zyýan" ýetirjekdigini aýtdy.
Birleşen Ştatlaryň etrap kazysy Roýs Lamberth 10 sahypalyk kararda neşiriň ýapylmagyny togtatmak üçin TRO-nyň, wagtlaýyn çäklendirme buýrugynyň zerurdygyny, sebäbi Azatlyk Radiosynyň kazyýet işinde ýeňiş gazanjaga meňzeýändigini, USAGM-iň erkin ýaýlymyň ykbaly baradaky çäreleriniň kazyýet diňlenişigi geçirilmezinden öň dowam etdirilmeginiň bu neşire “düzedip bolmajak zyýan” ýetirjekdigini we bu buýrugyň çykarylmagynyň jemgyýetçilik bähbidine laýyk gelýändigini aýtdy.
"USAGM-nyň ýolbaşçylygy, hakykatda hiç hili delil getirilmeýän bir sözlem bilen, eger-de prezident olara bu şeýle edilmeli diýip aýdan bolsa hem, Azatlyk Radiosyny ýapmaga mejbur edip bilmez" diýip, Lamberth aýtdy.
Indiki çäre Azatlyk Radiosynyň USAGM-den 30-njy sentýabrda tamamlanjak maliýe ýylynyň, ýagny 2025-nji ýylyň galan böleginde Kongresiň Azatlyk Radiosynyň işi üçin bölüp beren takmynan 77 million dollar serişdesiniň berilmegi barada eden talaby, deslapky gadaganlyk dogrusynda bolar.
Kazyýetiň bu karary ýakyn hepdelerde kabul etmegine garaşylýar.
Azatlyk Radiosynyň maliýeleşdirilmegine abanýan howp metbugat gözegçileriniň, analitikleriň we demokratiýa tarapdarlarynyň, şeýle-de Azatlyk Radiosynyň 27 dilde berýän gepleşiklerini 23 ýurtda diňleýän adamlaryň global goldaw tolkunyny döretdi.
Lambert öz çykaran kararynda ýazmagyna görä, görnüşinden, hökümetiň 1950-nji ýyldan bäri "kommunist propagandasyna sezewar bolýan diňleýjileri ygtybarly, ýerli habarlar" bilen üpjün etmek üçin, Azatlyk Radiosyny bir gural hökmünde ýörite goldaýandygyny boýun aldy.
"Biz kazy Lambertiň USAGM-iň Kongresiň ygtyýarlygyny äsgermezlik etmeginiň öňüni almak baradaky oýlanyşykly we eglişiksiz kararyna ýokary baha berýäris. Biz bu karardan soň öz pozisiýamyzyň has-da berkmegine garaşýarys, Kongresiň maliýe ýylynyň galan bölegine Azatlyk Radiosyna beren serişdelerini inkär etmegi konstitusiýa laýyk gelmeýär” diýip, AÝ/AR-nyň prezidenti we ýerine ýetiriji başlygy Stiwen Kapus bu karar çykarylandan soň aýtdy.
"Bu karar biziň dünýäniň dürli ýerlerindäki žurnalistlerimize mundan aňryk hem güýçli yşarat iberýär: Kongres tarapyndan kesgitlenen missiýa mynasyp we gymmatly bir zat, ol dowam etmeli. Azatlyk Radiosy 75 ýyl bäri dünýäniň iň repressiw jemgyýetleriniň köpüsinde senzura we wagyz-nesihatlara garşy göreşmek bilen, Amerikanyň milli howpsuzlyk bähbitleri bilen utgaşýar” diýip, ol aýtdy.
USAGM 15-nji martda, ABŞ-nyň prezidenti Donald Tramp tarapyndan gol çekilen ýerine ýetiriji buýruk ýedi agentligi, şol sanda Birleşen Ştatlaryň Global Metbugat agentligini "ulanylýan kanunlara laýyklykda iň ýokary derejede kemeltmegi" talap edeninden birnäçe sagat soň, Azatlyk Radiosynyň grantyny ýatyrjakdygyny aýtdy.
Forum