Aşgabadyň häkimiýetleri ilatdan sarp edilen gazyň töleglerini almak işine polisiýa işgärlerini hem çekip başladylar. Sebitiň gaz edarasynyň işgärleri muňa ýaşaýjylaryň tölegleri öz wagtynda geçirmezliginiň sebäp bolandygyny aýdýarlar. Ýaşaýjylar ýaşaýyş-durmuş şertleriniň günsaýyn agyrlaşýandygyny, tölegleri geçirmäge maddy mümkinçilikleriniň ýokdugyny belleýärler.
Azatlyk Radiosynyň sebitdäki habarçysynyň 11-nji ýanwarda beren maglumatyna görä, Bagtyýarlyk etrap polisiýa bölüminiň işgärleri täze ýylyň ilkinji günlerinden Gypjak we Herrikgala ýaşaýyş toplumlaryndaky ýaşaýjylaryň öýlerine ýekeme-ýeke aýlanyp başladylar.
“Polisiýa işgärleri ýaşaýjylardan tebigy gazyň tölegini geçirendigi baradaky kwitansiýany, delilnamany görkezmegi talap edýärler. Olar zorluk ulanmazdan, haýbat atyp, agraslyk bilen, sarp edilen gaz üçin tölegi geçirmegi talap edýärler” diýip, ýerli ýaşaýjy anonim şertde gürrüň berdi.
Polisiýa ýaşaýjylara töleg geçirmediklere “administratiw temmi” çäreleriniň görüljekdigini hem duýdurýarlar.
Adatça bolşy ýaly, bu çäreler barada resmi metbugatda hiç hili maglumat göze ilmeýär. Bu barada Azatlygyň Bagtyýarlyk etrap polisiýa bölüminden telefon arkaly kommentariý almak synanyşyklary hem oňyn netije bermedi.
Ýöne sebitiň gaz edarasynyň birnäçe işgäriniň anonim şertde habarçymyza aýtmagyna görä, ilatdan gaz töleglerini almak meselesinde polisiýanyň kömeginden peýdalanylmagyna ýaşaýjylaryň tölegleri öz wagtynda geçirmezligi sebäp boldy.
“Soňky aýlarda hojalyklaryň köpüsi gaz töleglerini geçirmekden köpçülikleýin boýun gaçyransoň, ‘Türkmengaz’ döwlet konserniniň ilaty gaz bilen üpjün edýän bölüminiň ýolbaşçylary Türkmenistanyň Içeri işler ministrliginden hat ýazyp, kömek sorady. Bu çäreler gaz ýolbaşçylarynyň ýazan hatlaryna berlen jogabyň netijesinde amal edilip başlandy” diýip, gaz edaranyň bir işgäri aýtdy.
Azatlyk bu barada agzalan konsernden we Içeri işler ministrliginden kommentariý alyp bilmedi.
Gypjaklylaryň ençemesi gaz töleglerini geçirmezliginiň sebäbini, ýaşaýyş-durmuş şertleriniň günsaýyn agyrlaşýandygy, tölegleri geçirmäge maddy mümkinçilikleriniň ýokdugy bilen düşündirýär.
“Käbir adamlar öz nägileligini polisiýa işgärlerine hem aç-açan beýan edip, olar bilen gaty sesde gürleşdiler we tölegleri geçirip bilmeýändiklerini aýtdylar” diýip, ýerli ýaşaýjy aýtdy.
Türkmenistanda 2019-njy ýylyň 1-nji ýanwaryndan başlap, ozal ilata mugt berlen tok, gaz we suw ýaly ýeňillikler tölegli edildi. Türkmen hökümeti munuň sebäbini ilatyň hal-ýagdaýynyň gowulanmagy we bazar ykdysadyýetiniň talaplary bilen düşündirdi.
Ýöne ýurtda dowam edýän ykdysady kynçylyklaryň we giň ýaýran işsizligiň arasynda girizilen tölegler köp sanly eli ýuka hojalyga goşmaça agram saldy. Habarçylarymyz ýurtda bu tölegleri töläp bilmeýän hojalyklaryň köpdügini ýygy-ýygydan aýdýarlar.
Häkimiýetler hojalyk hyzmatlarynyň tölegleriniň öz wagtynda geçirilişine gözegçiligi ýylda esasan iki gezek, hususan-da, ýanwar aýynda güýçlendirýärler.
Geçen hepde Lebapdaky habarçymyz Türkmenabat şäherinde gaz, elektrik, suw edaralarynyň we arassaçylyk gullugynyň işgärleriniň ýaşaýjylaryň öýlerine aýlanyp, sarp edilen hojalyk hyzmatlary üçin tölegleri tizden-tiz geçirmegi talap edip başlandygyny habar berdi.
Häkimiýetler, ilatyň tölegleri geçirmegini üpjün etmek maksady bilen, indi birnäçe ýyl bäri döwlet edaralarynyň ençemesinden zerur resminamalary soraýan raýatlardan hojalyk hyzmatlary üçin tölegleriň geçirilendigi baradaky kepilnamalary hem talap edýärler.
Energiýa serişdelerine baý Türkmenistanyň häkimiýetleri we mediasy bu ýagdaýlar barada aç-açan habar berip, ilatyň töleg geçirmekdäki kynçylyklary we munuň mümkin sebäpleri barada mesele gozgamaýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum