Russiýanyň prezidenti Wladimir Putin 26-njy maýda, käbir günbatar ýurtlarynyň Merkezi Aziýa ýurtlaryny Russiýanyň täsir çäginden daşlaşdyrmaga synanyşýandyklary baradaky habarlaryň arasynda, Özbegistana sapara geldi. Ol Daşkent howa menzilinde prezident Şawkat Mirziýoýew bilen duşuşdy.
Öňki sowet respublikasynyň paýtagty Daşkent rus lideriniň iki günlük sapary mynasyýetli iki ýurduň baýdaklary bilen bezeldi.
Özbegistanyň prezidentiniň metbugat gullugy prezidentleriň duşuşygynda "hemmetaraplaýyn strategiki hyzmatdaşlygy we ýaranlygy" pugtalandyrmak, "söwdany we ykdysady hyzmatdaşlygy ösdürmek" meselesiniň ara alnyp maslahatlaşylandygyny aýtdy.
Halkara derňewleriniň gelen netijesine görä, Özbegistan Russiýa sanksiýalardan sowlup getirilýän harytlar üçin esasy giriş nokatlarynyň biri bolup durýar.
Putin 2022-nji ýylyň fewral aýynda Russiýanyň Ukraina garşy başlan giň gerimli urşundan bäri az syýahat etdi. Bu sapar onuň maý aýynda täze prezidentlik möhletine girişeli bäri edýän üçünji daşary ýurt sapary boldy.
Rus habar gulluklary Putiniň Daşkende agşamara gelendigini we Mirziýoýew tarapyndan garşy alnandygyny, iki lideriň bir awtoulaga münendigini habar berdiler.
Kreml web sahypasynyň we Russiýanyň habar gulluklarynyň çap eden suratlarynda, wideoýazgylarda Putiniň Daşkendäki Täze Özbegistan seýilgähine baryp görendigi, Özbegistanyň garaşsyzlygynyň ýadygärligine gül dessesini goýandygy görkezildi diýip, "Roýters" habar berýär.
Habar gulluklarynyň Kremliň metbugat wekiliniň sözlerine salgylanyp ýazmagyna görä, Dmitriý Peskow rus telewdieniýesine beren interwýusynda Russiýanyň Özbegistan bilen gaz üpjünçiligi meselesinde has giň hyzmatdaşlyga açykdygyny we "bu ýerdäki mümkinçilikleriň örän giňdigini” nygtady.
Putin prezident saýlawynda beýleki dalaşgärlerden has köp ses alyp, täze möhlete saýlanmagy üpjün edeli bäri gysga wagtda Hytaýa we Belarusa sapar etdi.
Kreml lideri Moskwa 2022-nji ýylyň fewral aýynda Ukraina çozaly bäri daşary ýurda örän az syýahat etdi.
Forum