«Bu nahar diňe bir Merkezi Aziýada däl, eýsem Dumanly Albionda-da halklary birleşdirýär» diýip, Özbegistandan bolan är-aýal Akbar hem Sanobar Majidowlar öz işleri barada aýdýarlar. Olar Londonyň köçe bazarlarynda, palaw bişirip satýarlar. Bu maşgala birnäçe ýyl mundan ozal Samarkantdan bu ýere gelipdi, häzir Londonyň ýaşaýjylarynyň göwnüni öz palawy bilen awlaýarlar.
Londonda köçedäki azyk bazarlary örän ýörgünli, aýratyn-da, uly ofis edaralarynyň golaýynda meşhurdyr. Geçen ýyldan bäri bu ýerde, Majidowlar maşgalasynyň Samarkant palawyny-da tapyp bolýar.
«Bu ýerde goýun eti beýle bir meşhur däl. Biz adamlara dadyp görmegi teklip edýäris. Onsoň olar: “O-how, nähili tagamly eken” diýýärler. Olar hökman, biziň azajyk tagam dadyran adamlarymyzyň ählisi muňa haýran galýarlar» diýip, Sanobar Majidowa gürrüň berýär.
Akbar Majidow Samarkantdan Londona iňlis dilini öwrenmek üçin gelipdi, soňra tutuş maşgalasy-da geldi. Okuw okap hem işläp, iňlis dilini kämilleşdirenden soň, Sanobar maşgala biznesini ýöretmegi ýüregine düwdi. Londonda beýe işi ýöretmek aňsat däl, dünýäniň ähli nahar-aşpezligi bilen bäsleşmeli.
«Öz işimi açanlaryň köpüsi ony ilkinji ýylda ýapýarlar, sebäbi bäsdeşlik örän ýokary. Ýanýoldaşym ikimiz maksada eýerdik. Iňlisçe aýdylyşy ýaly background, ýagny biziň terbiýämiz örän gowy, düýpli terbiýämiz bar. Çagalykdan şeýle däbimiz bar. Biz örän myhmansöýer millet. Bu bize aňsat başardýar» diýip, ol biznes işgäri aýdýar.
Sanobar bilen Akbaryň dört çagasy bar. Londonda ýaşaýyş şertiniň gymmatlygy we ýokary salgytlar sebäpli köp işlemeli bolýar. Majidowlar köçe bazarlarynda işlemekden daşary-da, sargytlary alyp, uly kompaniýalar üçin, nahar taýýarlaýarlar. Bu ýerde erkinligiň bardygy we para-peşgeşiň ýoklugy sebäpli, işi üstünlikli guramaga mümkinçilik döreýär diýip, Sanobar aýdýar.
«Bu ýerde azatlyk bar, bu ýerde özüňi arkaýyn we howpsuz duýýarsyň. Her bir adamyň syýasy garaýşy dürli-dürli. Bu ýerde her kimiň durmuşa öz garaýşy, öz pikiri bar, her biri-de öz pikirine görä örän aýratyn. Emma hiç kim hiç kimi kemsitmeýär. Şu tarapdan, ol maňa diýseň ýaraýar. Elbetde, munuň kemçiligi-de bar. Bu bir şahslaryň ýurdy. Her kim öz islegine görä ýaşaýar. Ýöne bu ýerde bir-birege hormat, ýaşululara sylaşyk, mugallymlara hormat goýmak ýetmezçilik edýär» diýip, Sanobar hasaplaýar.
Hindistanda «pilaw», Eýranda «polou», rusça — «plow», özbekler «palow» diýýärler, ispança «paella», ol hem «pilaw» sözünden
Palaw märeke çäreleri üçin bişirilende, uly gazanda taýýarlanylýar. «Biziň palawymyz Buhara palawyna meňzeş – diýip, Akbar Majidow gürrüň berýär. – Biz ony gat-gat edip, ýagny garman taýýarlaýarys. Orta goýanymyzda-da şeýle hödürleýäris. Owaly diňe tüwdi, soňra onuň üstünden käşir, iň üstündenem eti goýýarys. Beýleki şäherlerde palaw taýýar bolanda, ony garýarlar».
Majidowlar adamlaryň palawyň haýsy halka degişlidigi we ony nädip dogry bişirmek baradaky jedellerini halamaýarlar. Bu maşgala palaw adamlary bölmeli däl-de, birleşdirmeli diýip hasap edýär.
«Hindistanda – "pilaw", Eýranda "polou", rus dilinde "plow", biz "palaw" diýýäris, özbekler "palow". Iň geň tarapy-da, ispança "paella" diýilýär, onuň hem köki hindi dilindäki "pilawdan" gelýär. Bu şeýle halkara nahar, oňa hemmeleri bir tagamyň başyna jemleýär diýmek mümkin» diýip, Sanobar Majidowa aýdýar.
Majidowlar Londonda öz restoranyny açmagy, ol ýerde diňe milli nahar däl, eýsem milli däpleri görkezýän bezeg-nagyşlaryň, aýdym-sazlaryň hem bolmagyny arzuw edýärler. Özlerinde Samarkant medeniýetiniň kiçijik bölegini Britaniýanyň paýtagtyna getirmäge iňňän uly höwesiň bardygyny aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum