Daşoguz welaýatynyň Boldumsaz etrabynda 30-njy oktýabrda gündiz bolup geçen ýol-ulag hadysasynda alty adam heläk boldy. Şondan bir hepde öň, Türkmenabatda bolan ýol hadysasynda 25 ýaşlaryndaky bir erkek adam agyr ýaralandy. Ol sebit hassahanasynyň reanimasiýa bölüminde bejergi alýar.
Azatlyk Radiosynyň Boldumsaz etrap polisiýa bölümindäki çeşmesiniň tassyklamagyna görä, Daşoguz – Saparmyrat Türkmenbaşy gara ýolunyň üstünde bolup geçen ýol heläkçiliginde iki ýeňil awtoulag biri-birine pete-pet baryp urýar.
“Daşoguz tarapdan barýan Lexus kysymly ýeňil awtoulag bilen Saparmyrat Türkmenbaşy etrabyndan gelýän Toyota Camry kysymly ulag pete-pet çakyşdy. Lexusda dört adam çakyşmada ulagyň partlamagy netijesinde wakanyň bolan ýerinde heläk boldy. ‘Toyota Camry’ ulagynda jemi bäş adam bar ekeni, şolardan sürüji we onuň gapdalyndaky ýolagçy öldi” diýip, Polisiýanyň ýol gözegçiligi gullugynyň Boldumsaz bölümindäki çeşme Azatlyk Radiosynyň habarçysyna gürrüň berdi.
Bu hadysa Boldumsaz etrabynyň günbatar böleginde, Daşoguz – Sapamyrat Türkmenbaşy gara ýolunyň üstünde bolup geçýär.
Çeşmäniň sözlerine görä, Lexus kysymly awtoulagyň eýesi Saparmyrat Türkmenbaşy etrabynyň ýaşaýjysy bolup, ol bu ulagy iki gün ozal satyn alan ekeni.
“Bu ulagyň eýesiniň ulag dolandyrmak tejribesi ýok, sürüjilik şahadatnamasyny hem satyn alypdyr. Ol Orsýetde işläp gelip, Leksus satyn alypdyr. Yzynda ýaş çagalary galdy” diýip, polisiýadaky çeşme aýtdy.
Ýerli sürüjiler Daşoguz-Saparmyrat Türkmenbaşy awtomagistralynyň hiliniň ýaramaz bolandygyny, bu ýoldaky çukanaklaryň ulaglary ýoldan çykarýandygyny aýdýarlar.
“Bu ýola iki maşyn zordan sygýar. Ulag sürüjileri çukanaklardan ýaňa, ýollarda tekiz ýol gözläp, ýol-ulag hadysalaryna sebäp bolýarlar” diýip, sürüjiler aýdýar.
Bu hadysadan bir hepde çemesi ozal, 23-nji oktýabrda Lebap welaýatynyň Türkmenabat şäherinde bolup geçen aýrybaşga ýol-ulag hadysasynda pyýadalara niýetlenen geçelgeden ýöräp barýan 25 ýaşlaryndaky bir erkek adam ýeňil awtoulagyň kakmagy netijesinde agyr ýaralandy.
Bu waka Türkmenabat şäheriniň Üçünji kwartalynyň golaýynda, S. A. Nyýazow köçesiniň ugrunda bolup geçýär.
“Ak reňkli bir maşyn pyýada geçelgeden geçip barýan bir erkek adamy kakdy. Ýaş ýigit agyr ýaralandy, zordan dem alýardy, asfalt gana boýaldy” diýip, bir türkmenabatly aýdýar.
Şaýatlar wakanyň bolan ýerine dessine tiz kömek gullugyny çagyrypdyrlar, ýöne tiz kömek wagtynda gelip ýetişmändir.
“Ýol hadysasyna sebäp bolan ulagyň sürüjisi dessine ulagdan çykyp, asfaltyň üstünde ýatan oglanyň ýagdaýyny gördi we şok boldy. Sürüji we beýleki adamlar dessine tiz kömege jaň edip başladylar. Ýarym sagat ýaly garaşyldy, ýöne tiz kömek gelmedi. Biçäre oglanyň her näme-de bolsa çöregi bitin ekeni. Polisiýa işgärleri geleninden soňra, ýaralanan adamy ýol hadysasyna sebäp bolan ulaga mündirip, trawmatologiýa bölümine alyp gitdiler” diýip, bir şaýat aýdýar.
“Asfaltyň ýüzündäki ganlary dessine aýyrmak üçin, Ikinji etrapçanyň jemagat gullugynyň işçilerini arassalaýyş işlerine çekdiler” diýip, beýleki bir şaýat gürrüň berýär.
Türkmenabat şäher polisiýa bölümindäki çeşmäniň sözlerine görä, ýaralanan adam şäher keselhanasynyň reanimasiýa bölümine geçirilipdir.
Ýol hadysasyna sebäp bolan sürüjiniň ykbaly häzirlikçe mälim däl.
Azatlyk Radiosy ýol-ulag hadysalary boýunça Daşoguz hem-de Lebap welaýatlarynyň ýerli häkimiýetlerinden resmi teswir alyp bilmeýär.
Türkmenistanyň Içeri işler ministrligi ýol-ulag hadysalary boýunça statistikalary çap etmeýär. Döwlet media serişdeleri ýurtda bolup geçýän ulag heläkçilikleri barada habar bermeýär.
Azatlyk Radiosynyň habarçylary diňe 2023-nji ýylyň özünde ýurduň dürli sebitlerinde bolup geçen azyndan 15 sany ýol-ulag hadysalary barada habar berdiler. Bu hadysalarda onlarça adam heläk bolup, bir topar adam ýaralandy. 2022-nji ýylyň degişli döwürleri bilen deňeşdirilende geçen ýylyň dowamynda ýol-ulag habarlary has-da ýygjamlaşdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum