Russiýanyň prezidenti Wladimir Putin Moskwanyň Ukrainadaky alyp barýan urşunda öz öňünde goýan esasy maksadyna ýetmäge “golaýlandygyny” aýtdy, şeýle-de Russiýanyň Oreşnik atly täze gipersonik ballistik raketasynyň hem gatnaşmagynda, Birleşen Ştatlara raketa “duelini” geçirmegi teklip etdi.
Putin bu barada 19-njy dekabrda, özüniň ýyllyk metbugat ýygnagynyň dowamynda çykyş etdi. Ol bu çäräni esasan Russiýanyň tas ähli pudagyna, syýasy we ykdysady ugurlaryna gözegçilik edýändigini äşgär etmek üçin ulandy. Putin çykyşynda ýurduň ykdysady ösüşi bilen öwünse-de, Kremliň Ukrainadaky alyp barýan doly gerimli urşy sebäpli girizilen halkara gadagançylyklaryň netijeleri barada dymdy.
Russiýada eýýäm çärýek asyr bäri häkimiýeti öz elinde saklaýan Putin, Russiýanyň güýçleriniň Ukrainanyň front çyzygy boýunça öňe ilerleýändiklerini aýtdy we esasy maksatlaryna ýetmäge golaýlandyklaryny öňe sürdi.
Ol munuň bilen anyk nämäni göz öňünde tutandygyny aýdyňlaşdyrmady. Emma ozalky çykyşlarynda ol, parahatçylygyň Ukrainada “denazifikasiýa we ýaragsyzlandyrmak bolup geçenden soň, we onuň bitarap bolanyndan soň” mümkin bolup biljekdigini aýdypdy.
Şol bir wagtda, Putin ýurduň günbataryndaky Kursk regionynda haçan doly gözegçiligiň ornaşdyryljakdygyny anyk aýdyp bilmejekdigini boýun aldy. Awgustda Ukraina garaşylmadyk ýagdaýda Kursk regionyna girdi we häzirem ol sebitlere gözegçilik edýär.
Putin häkimiýet başyna geçeli bäri, Russiýa barha köp awtoritar dolandyryşa ýykgyn edip başlady.
Emma 2018-nji ýylyň saýlawlardan soň, bu ugurdaky hereketler hasam ýygjamlaşdy, onsuz hem basyş astyndaky oppozisiýa doly weýran edildi.
Şu ýylyň başynda, Putiniň iň belli tankytçysy Alekseý Nawalny Sibiriň türmeleriniň birinde aradan çykdy.
Metbugat ýygnagynyň dowamynda ýarag meselesi gozgalanda, 72 ýaşly Putiniň sesi hasam haýbatly ýaňlanyp başlady. Ol Moskwa bilen Waşingtonyň bir nyşanany saýlap almagyny, oňa Birleşen Ştatlaryň gorag ulgamynyň esewan etmegini, we özlerine şol nyşana Oreşnik raketasy bilen zarba urmagyna ygtyýar berilmegini teklip etdi.
“Biz şeýle synagy geçirmäge taýýar” diýip, Putin nygtady.
Russiýa Oreşnik atlandyrylýan raketa bilen 21-nji noýabrda Ukrainanyň Dnipro şäherine zarba urupdy.
Putin şol pursat, munuň Ukrainanyň ABŞ tarapyndan üpjün edilen ATACMS we Britaniýanyň beren Storm Shadow raketalary bilen Russiýanyň içine zarba urmagyna jogap hökmünde edilendigini aýdypdy.
Bilermenler Russiýanyň orta aralyga niýetlenen täze raketasyny atmak bilen, özüniň harby kuwwadyny görkezmekden has köp, syýasy bir yşarat etmek isländigini belleýärler.
Forum