Kreml Russiýada we goňşy Gazagystanda, garyň adatdakylaryndan çalt eremegi netijesinde dörän we soňky onýyllyklardaky iň erbet silde suw derejesiniň birnäçe sebitde entegem ýokarlanmak ähtimallygynyň bardygyny duýdurdy.
Bu suw joşguny häzire çenli Russiýada we Gazagystanda onlarça müň adamy ýaşaýan ýerinden gaçmaga mejbur etdi.
Ýerli resmileriň habar bermegine görä, Ural daglaryndan we Sibirden gelýän suw 10,000-den gowrak jaýy basdy we ýene müňlerçe adamy howp astynda goýdy.
Demirgazyk Gazagystandaky ýagdaýyň has erbetdigi we 86,000-den gowrak adamyň ewakuasiýa edilendigi habar berildi.
Iki ýurduň birnäçe sebitiniň resmileri, öz görýän çärelerini utgaşdyrmak üçin, gyssanmaç adatdan daşary ýagdaý yglan etdiler.
"Öňde entek kyn günler bar" diýip, Kremliň metbugat wekili Dmitriý Peskow 9-njy aprelde Moskwadaky žurnalistlere aýtdy.
Peskow Russiýanyň prezidenti Wladimir Putiniň betbagtçylyga garşy görülmeli bilelikdäki çäreler barada maslahatlaşmak üçin gazak kärdeşi Kasym-Žomart Tokaýew bilen telefonda gepleşendigini aýtdy.