Daşoguzda täze ýylyň öňýany birnäçe ýol hadysasy hasaba alyndy, olaryň birinde üç adam heläk boldy. Görogly etrabynda 31-nji dekabrda ýüze çykan pajygaly ýagdaý barada Azatlygyň Türkmenistandaky habarçysy maglumat berýär.
Görogly etrabynyň merkezinde adam pidasyna getiren ýol heläkçiligi 31-nji dekabrda ir sagat 9 töwereginde ýüze çykypdyr. Ýol hadysasyna uçran awtoulagyň içinde jemi bäş adam bolupdyr.
"Awariýa uçran awtoulagda jemi 5 adam bolup, hususy taksi bir obadan bolan adamlary täze ýyl baýramyna söwda etmek üçin etrap merkezine bazara getirýän ekeni. Olaryň üçüsi wakanyň bolan ýerinde Ataýew köçesiniň daýhan bazar çatrygyndaky swetoforda wepat boldy. Iki adam agyr ýaralandy. Hadysanyň sebäbi aşa tizlikde barýan awtoulag dar köçeden çykyp, beýleki duran ýük ulagyna baryp urupdyr" diýip, ýagdaýdan habarly çeşme gürrüň berdi.
Şaýatlaryň we ýagdaýdan habarly çeşmeleriň Azatlyk Radiosyna beren maglumatlaryna görä, hadysada ýaş çaganyň ejesi bolan bir zenan maşgala we iki erkek adam ýogalypdyr.
Daşoguz welaýatynda täze ýylyň öňýany we 1-nji ýanwara geçen gijesinde jemi 4 sany ýol hadysasy hasaba alnypdyr. Göroglydaky pajygaly hadysadan başga beýlekilerden adam ýitgileri bolman, ýol heläkçiligine uçran adamlar ýaralanypdyr. Awariýa düşen awtoulaglar zaýalanyp, uly maddy çykdajylar bolupdyr.
Azatlyk Radiosy Daşoguz welaýatynda bolan ýol hadysalary barada ýerli polisiýa wekillerinden resmi görnüşde teswir alyp bilmedi.
Azatlyk bilen anonimlik şertinde gürleşen polisiýa işgärleri we awtoulag sürüjileri welaýatyň içindäki we sebiti ýurduň beýleki ýerleri bilen birleşdirýän uly ýollaryň gaty erbet ýagdaýdadygyny, wagtynda bejerilmedik deşikleriň ulag hereketini howpsuzlygyna wehim salýandygyny aýtdylar.
"Aşgabat-Daşoguz gara ýoly hamana bomba düşene meňzeýär. Ýoldaky çukurlardan ýaňa hereket etmek kyn. Käbirleriň içine Kamaz maşyn gaçyp bilýär" diýip, daşoguzly sürüji gürrüň berýär.
Sürüjileriň sözlerine görä, ýaşaýyň ýerlerinde köçeleriň yzly-yzyna tutuşlygyna, ýa-da bölekleýin ýapylmagy köçe-ýol hereketini agyrlaşdyrýar we awtoulaglaryň geçmegine hem-de zerur ýerde saklanmagyna päslgel berýär.
"Etrap merkezlerindäki tas ähli jemagat ýerlerinde bazar, dermanhana, marketler ýaly ýerleriň öňlerinde durmak gadagan diýlip, ýol belgileri goýulýar. Awtoulaglar üçin duralgalar hem ýok. Şäherde bar bolan duralgalar bazarlardan daşda. Dar köçeler kynçylyk döredýär" diýip, çeşme aýdýar.
Türkmenistanda ilat köpçüligi şäherler we oba ýerlerinde ýollaryň ýaramazlygyndan ejir çekýärkä, resmi metbugatda ýurtda döwrebap täze ýollaryň gurulýandygy habar berilýär.
Ýollaryň ýaramazlygy we ýol hadysalary baradaky habarlar türkmen resmileri tarapyndan kommentirlenmeýär.
Azatlygyň habarçylary 2024-nji ýylda Türkmenistanda ýol hadysalarynyň, şol sanda heläkçilikli ýagdaýlaryň onlarçasy barada habar beripdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum