Mary welaýatynyň köpugurly bazarynyň söwdagärleri alyjylaryň azalmagyna garşy çykalga gözleýär. Bir ýyl töweregi mundan ozal, pandemiýa çäklendirmeleriniň yzysüre gaýtadan açylan iri bazaryň telekeçileri söwda işini täzeden janlandyrmak ugrunda tagalla edýärler. Bazarlarda emele gelen durgunlylyk söwdagärleri häkimiýetlerden haraý gözlemäge iterýär.
Azatlyk Radiosynyň habarçysy bilen gürrüňdeş bolan söwdagärlere görä, pandemiýa çäklendirmeleriniň getiren negatiw täsirleri, galyberse-de, Mary şäherindäki bazarlaryň alyjylara hödürleýän amatlyklary, köpugurly bazaryň şäheriň çetinde ýerleşmegi ýaly sebäpler söwda işiniň haýallamagyna getirýär.
Maglumat üçin aýdylsa, Türkmenistanda indi ençeme ýyl bäri dowam edýän ykdysady kynçylyklaryň arasynda, ilatyň satyn alyjylyk ukyby ymykly pese gaçdy. Raýatlaryň aýlyk girdejileri bilen bazar bahalarynyň arasynda aratapawut emele geldi.
“Welaýatyň merkezi bazary şäheriň çetine göçürilenden soňra, gurby çatan söwdagärler şäheriň içinden ýa-da şäheriň içindäki bazarlardan söwda nokatlaryny satyn alyp, söwda işlerini dowam etdirdiler. Güýji ýetmedikler şäheriň çetine, Aşgabat ýolunyň ugrunda ýerleşýän bazara gitmeli boldular” diýip, bir söwdagär Azatlyk Radiosynyň habarçysyna gürrüň berdi.
“Halk bu bazary daş görýär” diýip, ol sözüniň üstüni ýetirdi.
Mary welaýatynyň “Mary” köpugurly söwda bazary Mary – Aşgabat gara ýolunyň 12-nji kilometrinde ýerleşýär.
Azatlyk Radiosynyň habarçysy bilen gürrüňdeş bolan şäher ýaşaýjylary söwda üçin özleriniň Mary şäheriniň içinde ýerleşýän bazarlary, şol sanda “Gök bazary” we Lomaý-söwda dükanlaryny saýlaýandyklaryny aýdýarlar.
Alyjysy egsilen iri bazardaky telekeçiler söwda işleriniň haýallamagy bilen, çözgüt sorap, ýaňy-ýakynda Mary welaýatynyň häkimligine arz-şikaýat bilen ýüz tutupdyrlar.
Häkimlik söwdagärleriň arzasyna jogap hökmünde, şäherdäki kiçi bazarlary hepdäniň dowamynda gezekleşdirip, ýapmak kararyna gelipdir. Şeýlelikde, alyjylar häkimligiň gatyşmagy bilen, şäheriň çetindäki köpugurly bazara ugrukdyrylýar. Bu ýagdaýyň kiçi bazarlaryň söwdagärlerine ýetiren täsirleri aýdylmaýar.
“Uly bazaryň söwdagärleri bazarlaryň arasyndaky bäsdeşligiň hötdesinden gelip bilmänsoň, soňky çäre hökmünde arz-şikaýat bilen welaýat häkimligine ýüz tutdular. Munuň yz ýany, Marynyň welaýat häkimligi hepdäniň dowamynda şäheriň içindäki bazarlary gezekleşdirip, ýapmak kararyna geldi. Uly bazarda söwdanyň bolmagy üçin, şeýle çäre tapyldy” diýip, bir söwdagär Azatlyk Radiosynyň habarçysyna gürrüň berdi.
Azatlyk Radiosy Mary welaýatynyň häkimliginden kommentariý alyp bilmedi.
Türkmenistanyň dürli sebitlerinde soňky on ýylyň dowamynda gurlan käbir bazarlaryň we täze awtomenzilleriň şäherleriň çetinde ýerleşmegi ýerli ýaşaýjylar üçin dürli amatsyzlyklary döretdi.
Global koronawirus pandemiýasynyň fonunda Türkmenistanda köpçülik ýerleri, şol sanda bazarlar iki ýyl töweregi möhlet bilen ýapyk saklandy.
Bazar söwdagärleriniň birnäçesi Azatlyk Radiosynyň habarçysy bilen gürrüňdeşlikde pandemiýa döwründe özleriniň söwda nokatlaryny terk edip, işsiz galandyklaryny gürrüň berýärler.
Biraz öň, Mary welaýatynyň Baýramaly şäherinde polisiýa işgärleri köçe söwdagärlerine garşy reýd geçirdi. Şonda eli ýuka satyjylar bazarlardaky söwda nokatlarynyň töleglerini gymmat hasaplaýandyklaryny aýtdylar.
Munuň yz ýany, Azatlygyň Lebap welaýatyndaky habarçysy Türkmenabat şäheriniň Merkezi bazarynda satuwa çykarylýan söwda nokatlarynyň köpelendigini habar berdi. Telekeçiler munuň sebäbini bazarda söwdanyň pes bolmagy we dükanlary kireýine alýan söwdagärleriň söwda nokatlaryny yzyna tabşyrýandygy bilen düşündirdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum