Türkmenabat şäherinde gurlan döwrebap ýaşaýyş jaýlary dabaraly ýagdaýda açylyp, ulanmaga berildi. “Watan” habarlarynyň 13-nji martda, türkmen prezidentiniň “Lebap” sement zawodynyň ikinji tapgyryny açan gününde beren reportažynda dört gatly, her biri 18 öýli iki jaýyň “Nusaý ýollary” kärhanasy tarapyndan gurlandygy aýdylýar, başga jikme-jiklikler, şol sanda ol jaýlaryň nähili şertlerde, haýsy pudagyň işgärlerine berlendigi anyklaşdyrylmaýar. Hökümete ýakyn hasaplanylýan, Aşgabatdan Türkmenabada çekilýän ýokary tizlikli awtomobil ýolunyň dört potratçysynyň biri bolan kompaniýanyň guran jaýlarynyň açylyşyna sebitde saparda bolan Serdar Berdimuhamedow gatnaşmady.
Türkmenistanda soňky onýyllyklarda jaý bahalary, gurluşyk materiallarynyň bahalary yzygiderli gymmatlady we, häkimiýetler bu ugurdaky kynçylyklary agzaman, täze jaýlaryň ulanylmaga berilmegini ilatyň ýaşaýyş-durmuş şertleriniň gowulanmagy ugrunda edilýän hökümet aladasy hökmünde wagyz edýärler.
Azatlygyň ýerli habarçysynyň maglumatyna görä, ulanmaga berlen jaýlaryň gurluşygy 2019-njy ýylda başlandy we, olaryň Türkmenabatdaky bank işgärlerine berilmegine garaşylýardy.
“Bu jaýyň gurluşygy 2019-njy ýylda başlanan bolsa-da, üç ýyllap diňe çüňkleri dikeldilen ýagdaýda durdy. Otaglaryň içindäki abadanlaşdyryş işleri uzak wagtlap bitirilmedi. Gurluşygyň näme üçin beýle uzaga çekendigi belli däl” diýip, ýerli ýaşaýjy Azatlygyň habarçysyna aýtdy.
Türkmen telewideniýesiniň habarynda täze jaýlaryň gurluşygynyň öz wagtynda tamamlanyp-tamamlanmandygy barada hiç bir zat aýdylmady.
Ulanmga berlen jaýlaryň gurluşygy 2019-njy ýylyň ýanwarynda belli bolan başga bir uly gurluşyk taslamasy, "Aşgabat-Türkmenabat" ýokary tizlikli ýolunyň gijikdirilýän gurluşygy bilen bagly bolup görünýär. Azatlygyň ozal habar berşi ýaly, ABŞ-nyň 2,3 milliard dollaryna durýan taslama “Türkmen Awtoban” ýapyk paýdarlar jemgyýetine ynanylypdy.
Azatlygyň söhbetdeşi “Watan” habarlarynda jaý alanlaryň işleýän ýerleriniň aýdylmandygyny belläp, başda bank işgärlerine niýetlenen jaýlaryň esasan ýol gurluşyk işgärlerine berlen bolmagynyň ähtimaldygyny öňe sürýär.
“Watan” habarlaryny görüň, jaý alanlar hiç bir edaranyň adyny tutman, özlerini diňe Türkmenabat şäheriniň ýaşaýjysy diýip tanadýar” diýip, ýerli ýaşaýjy öz pikirini delillendirdi.
Onuň pikiriçe, Türkmenabatdaky işsizlik we işleýän adamlaryň alýan aýlyklary bilen beýle jaýlary almak bir ýere sygyşmaýar.
“...ýönekeý bir Türkmenabat ýaşaýjysy bu jaýy satyn alyp bilýärmi? Bu jaýy guran firmanyň, “Nusaý ýollarynyň” ýegenlere degişli ýeri barmyş diýip eşitdim. Ýöne mende anyk maglumat ýok... Ýöne men anyk bilýän, bu jaýy satyn alan raýatlar türkmenabat ýasaýjylary däl. Aýdylmagyna görä, bu jaýlary aşgabatskiler, “Nusaý ýollary” firmasynyň işgärleri öz arasynda paýlaşyp, satyn alypdyrlar” diýip, adynyň aýdylmazlygy şertinde gürleşen ýerli ýaşaýjy öz pikirini aýtdy
Şeýle-de ol bu jaýlaryň daş-töwereginde we awtoparklarynda düşelen asfaltyň ýokary tizlikli ýoluň asfalt zawodyndan getirilendigini sözüne goşdy.
Mundan başga, Azatlygyň söhbetdeşi täze jaýyň birinji gatynda açylan täze dükanlardan bir dükanyň hem lebaply telekeçilere ýetmändigini öňe sürýär.
Türkmenistanyň gurulýan gurluşyklar bilen baglylykda ulanýan ýapyklygy, resmileriň garaşsyz neşire, şol sanda döwlet eýeçiligindäki habar serişdelerine hem açyk maglumat bermekden çekinmegi täze jaýlaryň eýeleri bardaky soraglary anyklamaga mümkinçilik bermeýär.
Jaýlaryň gurluşygynyň gijikdirilmeginiň mümkin bolan sebäbine gaýdyp gelsek, “Nusaý ýollary” döwlet tarapyndan buýrulýan gymmat bahaly taslamalardan uly paý alýan esasy firmalaryň biri bolup durýar. Emma muňa garmazdan, aýdylmagyna görä, ýurtdaky iş, maliýe kynçylyklary hiç bir firmanyň işine ‘peýda etmeýär’.
Azatlygyň habarçysynyň 2022-nji ýylyň sentýabrynda beren habaryna görä, köpmilliardlyk mega taslamada zähmet çekýän 250-den gowrak ussa we 500 töweregi kömekçi işçi ýerli potratçy firmalaryň özlerine töleg geçirip bilmezliginden nägile boldy.
Şonda iş taşlan ýerli gurluşykçylaryň esasan “Myradym”, “Nusaý ýollary”, “Ussat inžener” ýaly birnäçe kärhananyň işçileri bolandygy aýdylypdy.
Şu aralykda, “Türkmen.news” neşiriniň maglumatyna görä, ozal hökümetden amatly taslamalary alan “Ussat inžener” kompaniýasy öz işini bes etmeli bolýar.
Anonimlik şertinde gürleşen ýerli synçynyň pikirine görä, kiçi Berdimuhamedowyň Lebaba baryp, prezident maşgalasyna golaýdygy aýdylýan firmanyň guran jaýlarynyň ulanmaga berilmegine bagyşlanan uly dabara gatnaşmazlygy onuň özüni ‘ýegenler meselesinden’ daşrakda tutmak synanyşygyndan habar berýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum