Prezident Serdar Berdimuhamedow 23-nji oktýabrda BRIKS guramasynyň XVI sammitine gatnaşmak üçin Russiýanyň Kazan şäherine bardy. Türkmen metbugaty onuň bu sammite ilkinji gezek gatnaşýandygyny belleýär.
Türkmenistan öz oňyn bitaraplyk ýörelgesine salgylanyp, dünýä we sebit ýurtlarynyň ol ýa-da beýleki görnüşde geçirýän maslahatlaryndan köplenç çeke durýar we berk döwlet gözegçiliginde işleýän türkmen metbugaty bu hili maslahatlar, şol sanda Russiýanyň Ukraina garşy alyp barýan urşy barada BMG derejesine geçirilýän ses berişlikler, resmi Aşgabadyň pozisiýasy hakynda ilata anyk maglumatlary bermegi zerur hasaplamaýar.
Şol bir wagtda, habarynda bellenmegine görä, “Abraýly halkara we sebit guramalary bilen netijeli dialogy ösdürmek Türkmenistanyň oňyn Bitaraplyk, parahatçylyk söýüjilik, netijeli hyzmatdaşlyk ýörelgelerine esaslanýan daşary syýasat strategiýasynyň ileri tutulýan ugurlarynyň biri bolup durýar”.
Şeýle-de, TDH Berdimuhamedowyň bu sammite onuň hormatly myhmany hökmünde gatnaşmagyny ýurduň halkara abraýynyň belentliginiň... ykrar edilmeginiň nyşany hasaplaýar.
BRICS 2006-njy ýylda Peterburg halkara ykdysady forumynyň çäklerinde esaslandyryldy. Ilki onuň düzümine Russiýa, Braziliýa, Hindistan, Hytaý we Günorta Afrika Respublikasy girdi, şu ýyl bu birleşmä Müsür, Efiopiýa, Eýran, BAE we Saud Arabystany goşuldy.