Tramp administrasiýasy Birleşen Ştatlaryň Halkara Ösüş Agentliginiň üsti bilen daşary ýurtlara iberilýän ýardamlary 90 % kemeltdi diýip, CNN kazyýet kagyzlaryna salgylanyp habar berýär.
“Tutuşlygyna alnanda, USAID-iň 5800 sany granty ýatyryldy, 500-den gowrak grant bolsa togtadyldy” diýip, administrasiýanyň beýanatynda aýdylýar. “Togtadylan grantlaryň iň ýokary umumy möçberi 57 milliard ABŞ dollaryna barabardyr” diýip, beýanat aýdýar.
Şeýle-de, resminamada USAID-iň grantlarynyň ýatyrylmagy bilen bir hatarda, takmynan 4100 sany hökümet grantlarynyň hem goýbolsun edilendigi, ýöne 2700 çemesi grantyň öz güýjende galýandygy aýdylýar. Bulardan başga-da, 297 sany maliýeleşdiriş kararlaryna seredilýär diýip, Tramp administrasiýasy aýdýar.
Administrasiýa daşary ýurtlara iberilýän ýardamlaryň doňdurylmagyna garşy açylan sud işiniň çäklerinde grant maksatnamalary boýunça kazyýete düşündiriş berdi.
Birleşen Ştatlaryň Halkara Ösüş Agentligi hökümet gullugy bolup, dünýäde 10 müň çemesi işgäri bolan gurama Kongres tarapyndan 1961-nji ýylda esaslandyryldy. Halkara ýardamlardan jogapkär esasy hökümet edarasyna dünýäniň iň bir garyp ýurtlaryndaky maksatnamalary maliýeleşdirmek maksady bilen Kongres tarapyndan her ýylda milliardlarça dollar bölünip berilýär.
Kongresiň Gözleg-barlag gullugynyň soňky hasabatyna görä, Halkara Ösüş Agentligine 130 ýurtda dürli taslamalary maliýeleşdirmek üçin 2023-nji ýylyň býujetinden 40 milliard dollar çemesi maliýe serişdesi bölünip berlipdir. Ýardam kabul eden iň esasy üç ýurt Ukraina, Efiopiýa we Iordaniýa bolup durýar, Owganystan hem ilkinji onluga giripdir.
Tramp administrasiýasy häzirki wagtda bu agentligň işlerine garaýar, onuň dünýä boýunça ýardam maksatnamalary doňduryldy.