20-nji dekabrda irden Russiýanyň Ukrainanyň paýtagtyna we günortasyndaky Herson regionyna garşy amala aşyran giň gerimli raketa hüjüminiň netijesinde azyndan iki adam öldi, başga-da ençemesi ýaralandy.
Russiýanyň diňe Kiýewe garşy sekiz raketa goýbereninden soň, Ukrainada ençeme sagatlap howa hüjümi baradaky umumy duýduryş signallary ýaňlandy. Russiýanyň Ukrainanyň paýtagtyna atan raketalarynyň arasynda, şol sanda Kinžal kysymly gipersonik raketalary we Iskander/KN-23 kysymly ballistik raketalary hem bardy diýip, Kiýewiň harby administrasiýasynyň başlygy Serhiý Popko mälim etdi.
Ukrainanyň şäherleri we infrastrukturasy Russiýanyň dowamly dron we raketa hüjümlerinden ejir çekýär. Bu aralykda, ok-däri we şahsy düzüm babatda Russiýadan yzda galýan Ukrainanyň güýçleri ýurduň gündogarynda Moskwanyň öňe ilerlemegi bilen bagly kynçylyklary başdan geçirýärler.
Russiýanyň zarbalary netijesinde Kiýewiň Holosiýiw etrabynda bir adam heläk boldy. Şaýatlar şäheriň ençeme sebitinde partlamalaryň bolandygyny aýdýarlar.
“Duşman, görnüşinden, Kinžal aeroballistik raketalary we Iskander/KN-23 kysymly ballistik raketalary ulandy” diýip, Popko aýtdy we hüjümiň netijesinde gazgeçirijä zeper ýetendigini belledi.
Kiýewiň häkimi Witaliý Kliçkonyň beren maglumatlaryna görä, paýtagtyň üstünde urlan dronlaryň galyndylary dört etraba, ýagny Holosiýiw, Solomýansk, Şewçenkiwsk we Dniprowsk etraplaryna gaçyp, azyndan iki adamy ýaralapdyr.
Hersonda Russiýanyň hüjümi netijesinde 60 ýaşly bir erkek kişi heläk boldy we başga-da iki adam, şol sanda 86 ýaşly bir ýaşaýjy ýaralandy. Bu barada regional häkim Roman Mroçko Telegramda habar berdi.
19-njy dekabrda giçlik Russiýa raketalar bilen Ukrainanyň günorta-gündogaryndaky Krywiý Rih şäherine hüjüm edip, iki gatly ýaşaýyş jaýyna uly zeper ýetirdi. Prezident Wolodymyr Zelenskiniň dogduk şäherine edilen hüjümde bäş adam ýaralandy, soňy bilen iki adam hem harabalyklaryň arasyndan çykaryldy.
Hüjüm sebäpli 600 müň ilatly şäheriň ençeme sebitinde elektrik üpjünçiligi kesildi, şeýle-de bir keselhana zeper ýetdi. Bu barada regional häkim Serhiý Lysak maglumat berdi.
Russiýanyň Goranmak ministrligi 20-nji dekabrdaky zarbalaryň Ukrainanyň Günbataryň üpjün eden ýaraglary bilen Russiýanyň nyşanalaryny urmagyna "jogap" hökmünde amala aşyrylandygyny öňe sürdi. Ministrlik bu barada Telegram hasabynda ýazgy galdyrdy.
Russiýanyň soňky hüjümleri prezident Wladimir Putiniň özüniň berk gözegçilikde gurnalan metbugat ýygnagynyň dowamynda Kiýewiň üstünde “ýokary tehnologiki dueli” geçirmegi teklip etmeginiň ertesi gününe gabat geldi. Putin bu teklibi bilen, Russiýanyň Oreşnik atlandyrylýan täze gipersonik ballistik raketasyny Günbataryň üpjün eden howa hüjüminden goranyş ulgamlarynyň urup bilmejekdigini äşgär etmegi isläpdir.
“Bu biziň üçin gyzykly bolup bilerdi... Geliň, bu eksperimenti geçirip göreliň, bu tehnologiki dueli we netijelerine bakalyň. Meniň pikirimçe, bu biz üçin-de, amerikanlar üçin-de peýdaly bolardy” diýip, Putin aýtdy.
Muňa reaksiýa hökmünde, Zelenski X sosial ulgamynda Putini “tentek” diýip atlandyrdy.
“Adamlar ölýärler, ol bolsa munuň ‘gyzykly’ bolup biljekdigini pikir edýär... Tentek” diýip, Zelenski ýazgy galdyrdy.
Forum