Gündogar Türkiýede we goňşy Siriýada bolan güýçli ýer titremesinde ýykylan binalaryň harabalygynyň aşagynda galan adamalary halas etmek işleri dowam etdirilýär. Dünýäniň onlarça ýurdy ýaly Türkmenistan hem, ejir çekenlere kömek toparyny we zerur bolan önümleri iberdi. Azatlyk Radiosynyň çeşmeleriniň we sosial ulgamlarda peýda bolýan maglumatlardan çen tutulsa, ýer titremesiniň bolan sebitinde okaýan türkmenistanly studentleriň ençemesinden habar alyp bolmaýar.
6-njy fewral güni irden bolan 7,8 bally ýer titremesinde 5 müňden gowrak adamyň ölendigi habar berildi.
Türkiýäniň prezidenti Rejep Taýýyp Erdogan ýedi günlük milli ýas yglan etdi.
Hataý sebitinde resmiler 1500-e çenli binanyň weýran bolandygyny we hiç bir kömek ýa-da halas ediş topary gelmänsoň, köp adamyň harabalygyň aşagynda galandygyny habar berdiler.
Hataýda müňlerçe adam sport merkezlerinde ýa-da bazar zallarynda gaçybatalga tapdy, beýlekiler gijäni daşarda geçirmäge mejbur boldular.
Dünýä ýurtlary halas ediş işlerine kömek bermek üçin öz toparlaryny iberdi, emma şu wagta çenli hadysanyň bolup geçen ýerine gelip ýeten gyssagly kömek işgärleri az.
Howanyň aşa sowuk bolmagy we ýer yranmasyndan soň bolan 200-e golaý sarsgyn gözleg işlerinde bökdençlik döredýär.
TDH-nyň maglumatyna görä, Türkmenistanyň prezidenti Serdar Berdimuhamedow, Halk maslahatynyň başlygy Gurbanguly Berdimuhamedow bu hadysa sebäpli Türkiýäniň prezidenti Rejep Taýýyp Erdogana, Siriýanyň prezidenti Başar Al-Asada gynanç bildirdi.
Şeýle-de, 6-njy fewralda Türkmenistanyň daşary işler ministri Raşid Meredow bilen Türkiýe Respublikasynyň daşary işler ministri Mewlut Çawuşoglunyň arasynda telefon söhbetdeşligi boldy diýip, türkmen DIM-niň websaýty habar berýär.
Meredow Türkiýede köp adamyň ölmegine we ýaralanmagyna sebäp bolan ýer titremesi bilen baglanyşykly türk kärdeşine duýgudaşlyk we goldaw bildirdi diýip, habarda aýdylýar.
Ýertitreme zerarly ejir çekenlere kömek toparyny we zerur bolan önümleri daşaýan uçar sişenbe güni irden Aşgabatdan Türkiýä ugrady diýip, Türkiýäniň Türkmenistandaky ilçisi Togan Oral özüniň Twitter sahypasynda paýlaşdy.
7-nji fewralda paýlaşylan maglumatda uçaryň Türkmenistanyň Ministrler Kabinetiniň başlygynyň orunbasary, ýurduň bilim, saglyk, sport we ýaşlar meselelerine gözegçilik edýän wise-premýeri Nurmuhammet Amannepesow bilen Türkiýäniň Türkmenistandaky ilçisi Togan Oralyň gatnaşmagynda ugradylandygy hem bellenýär.
Bu barada, makalanyň çap bolan pursadynda, Türkmenistanyň metbugat serişdelerinde maglumat göze ilmedi.
Türk metbugat serişdeleri Türkiýäniň Türkmenistandaky ilçihanasynyň resmilerine salgylanyp, uçarda 10 adamdan ybarat lukman toparynyň we zerur bolan lukmançylyk önümleriniň bardygyny habar berýärler.
Türkiýe türkmenistanlylaryň zähmet migrasiýasy we ýokary bilim üçin iň köp ýykgyn edýän ýurtlarynyň biri hasaplanýar.
Tebigy betbagtçylykda türkmen raýatlarynyň arasynda zyýan çekenleriň bardygy barada häzirlikçe anyk maglumatlar elýeterli däl.
Ýöne ýer titremesiniň güýçli duýlan şäherlerinde, hususan-da Gaziantepde we Kahramanmaraşda türkmenistanly studentleriň onlarçasy ýokary bilim alýar.
7-nji fewralda günortan wagty Azatlyk Gaziantebiň ýokary okuw jaýlarynyň birinde okaýan bir türkmenistanly student bilen habarlaşmagy başardy.
Howpsuzlyk aladalary sebäpli anonimlik şertinde maglumat beren türkmen studenti "özüniň saglyk ýagdaýynyň gowudygyny, ýöne türkmenistanly dört tanşyndan habar alyp bilmeýändigini" aýtdy.
6-njy fewraldan bäri Twitter we Instagram sosial ulgamlarynda türkmenistanlylara degişli ýaly bolup görünýän sahypalarda ýer titremesiniň bolan sebitinde okaýan we ýaşaýan käbir türkmen studentlerinden habar alyp bolmaýandygy barada ençeme maglumat çap edildi.
Maglumatlaryň birinde türkmenistanly dört studentden hiç hili habaryň ýokdugy aýdylýar. Ýöne ulanyjynyň birnäçe sagat soň çap eden täze maglumatynda olaryň tapylandygy we häzirki wagtda keselhanadadygy, maşgalalaryna hem habar berlendigi ýazylýar.
Başga bir maglumatda bolsa, Kahramanmaraşda okaýan türkmenistanly Gülsoltan bilen habarlaşyp bolmaýandygy aýdylýar.
Sosial ulgamlarda Türkiýede ýaşaýan türkmenleriň-de ýüzläp, awtobuslara münüp, ýer yranan ýerdäkilere kömege gidendigi barada hem maglumatlar peýda boldy.
Adatça bolşy ýaly türkmen häkimiýetleri we metbugat serişdeleri betbagtçylykda zyýan çekenleriň arasynda türkmen raýatlarynyň bardygy ýa ýokdugy barada maglumat bermeýärler.
Azatlyk Türkmenistanyň Stambuldaky konsulhanasy bilen habarlaşyp, türkmen raýatlarynyň kömek sorap ýüz tutýandygy ýa ýüz tutmaýandygy barada maglumat almaga synanyşdy. Ýöne redaksiýamyzyň 7-nji fewralda ikindine çenli telefon arkaly eden synanyşyklary oňyn netije tapmady.
Türk häkimiýetleriniň soňky maglumatyna görä, Türkiýede 221 müňden gowrak türkmenistanly kanuny rugsat bilen ýaşaýar. Resmi däl çeşmeler Türkiýedäki türkmenleriň umumy sanynyň, şol sanda bikanun ýaşaýan türkmenistanlylaryň resmi sanlardan ençeme esse ýokarydygyny çaklaýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum