Türkmenistan koronawirus pandemiýasy bilen baglylykda girizen çäklendirmeleriniň ýene birini ýatyrdy. Indi daşary döwletlerden Türkmenistana gelýän daşary ýurt raýatlaryndan üç gün karantinde bolmak talap edilmeýär. Bu barada Azatlyk Radiosynyň Lebap we Daşoguz welaýatlaryndaky habarçylary hem-de çeşmeleri maglumat berýärler.
"10-njy noýabrdan başlap Türkmenistanyň çägine gelýän daşary ýurt raýatlaryna, şol sanda özbegistanlylara, täjigistanlylara, gazagystanlylara we gyrgyzystanlylara üç gün karantinde bolmak talaby ýatyryldy" diýip, ýagdaýdan habarly daşoguzly çeşmämiz belledi.
Ol häzir Türkmenistanyň Özbegistan bilen arasyndaky serhetden, Daşoguz we Lebap welaýatlaryndaky gümrüklerinde diňe kowid testini tabşyryp geçip bolýandygyny, testiň netijesiniň takmynan dört sagatda mälim edilýändigini hem aýtdy.
"Şol aralykda gümrükde oturyp garaşmaly. Koronawirus testini tabşyrmakdan ýüz öwren ýolagçylar Türkmenistana goýberilmeýär" diýip, çeşmämiz sözüne goşdy.
Lebapdaky çeşmämiz mundan ozal Özbegistanda, Gyrgyzystanda we Täjigistanda okaýan türkmen talyplaryndan hem üç gün karantinde bolmagyň talap edilendigini, ýöne 10-njy noýabrdan başlap bu düzgüniň hem ýatyrylandygyny aýtdy.
Azatlyk bu aýdylanlar barada Döwlet arassaçylyk we keselleriň ýaýramagyna garşy göreş gullugyndan, agzalan welaýatlaryň saglyk bölümlerinden kommentariýa alyp bilmedi. Bu barada döwlet gözegçiligindäki media serişdelerinde hem maglumat göze ilmeýär.
Türkmenistan daşary ýurtlardan gelýän ýolagçylaryň hökmany karantinde bolmalydygy baradaky talaby koronawirus pandemiýasynyň başynda, 2020-nji ýylyň martynda güýje girizdi. Ilkibada 21 güne çenli ýeten bu talap, koronawirus çäklendirmeleriniň tapgyrlaýyn esasda gowşadylmagy bilen, ilki iki hepdä, soňra 10 güne, soňra-da ýedi güne we ahyrynda üç güne çenli azaldyldy.
Geçen aýyň başynda Türkmenbaşydaky çeşmämiz 5-nji oktýabrdan başlap daşary ýurtlardan Türkmenistana gelýän türkmen raýatlary üçin ozalky üç günlük karantin düzgüniniň ýatyrylandygyny, emma munuň daşary ýurtly ýolagçylar üçin henizem saklanyp galýandygyny habar beripdi.
Bu aralykda, Lebapdaky habarçymyz daşary ýurtlara gidýän türkmen raýatlaryndan koronawirus sanjymynyň edilendigi baradaky sertifakatyň hökmany talap bolmagynda galýandygyny habar berýär.
"Bu sertifikat rus we iňlis dillerine terjime edilen bolmaly. Türkmen raýatlary sertifikatsyz uçara goýberilmeýär" diýip, ýagdaýdan habarly türkmenabatly ýaşaýjy anonimlik şertinde aýtdy.
Türkmen häkimiýetleri şu ýylyň maý aýynyň ahyrynda koronawirus, hususan-da halkara gatnawlaryna degişli çäklendirmeleri gowşadyp başlady. Iýunyň başyndan bäri halkara uçar gatnawlarynyň ençemesi dikeldildi. Soňky bir aýyň dowamynda Türkmenistanyň daşary ýurtlar bilen aradaky uçar we gury ýer gatnawlary has-da köpeldi.
Türkmenistan global pandemiýanyň başyndan bäri ýurduň çäginde koronawirusyň ýeke hadysasynyň hem hasaba alynmandygyny tekrarlaýar. Ýöne Azatlygyň habarçylary we garaşsyz neşirler ýurtda bu kesele ýoluganlaryň we ondan ölenleriň sanynyň müňlerçedigini habar berdiler.
ABŞ-da ýerleşýän Johns Hopkins merkeziniň 11-nji noýabrda çap eden maglumatlaryna görä, koronawirus ilkinji gezek 2019-njy ýylyň dekabrynda Hytaýda ýüze çykarylanyndan bäri dünýä boýunça bu wirus sebäpli ölenleriň resmi sany 6,6 milliondan aşdy. Şeýle-de, 634 milliondan gowrak adamyň wirusa ýolugandygy hasaba alyndy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.
Forum