Türkmenistan halkara howa gatnawlarynyň we ugurlarynyň sanyny köpeltmekçi diýip, "Türkmenportal" prezident Serdar Berdimuhamedowyň bäşinji gün geçiren hökümet maslahatynda beren görkezmesine salgylanyp ýazýar.
Döwlet baştutany Ministrler kabinetiniň ýanyndaky Ulag we aragatnaşyk agentliginiň baş direktory Mämmethan Çakyýewe ýüzlenip, “halkara howa gatnawlarynyň ugurlaryny we sanlaryny ýokarlandyrmak barada teklipleri taýýarlamagy tabşyrdy” diýip, döwlet eýeçiligindäki media habar berdi.
Şeýle-de, agentligiň ýolbaşçysyna deňze çykalgasy bolmadyk ösüp barýan döwletleriň ulag ministrleriniň derejesindäki halkara maslahatda ara alnyp maslahatlaşylan hyzmatdaşlygyň ugurlaryny durmuşa geçirmek boýunça zerur işleri alyp barmak tabşyryldy.
Emma habarda daşary ýurtlarda galan we yzyna dolanmak isleýän türkmen raýatlary, türkmen aktiwistleriniň ýollary açmak barada edýän talaplary meselesinde hiç bir anyk zat aýdylmaýar.
Hökümetçi neşiriň maglumatyna görä, Türkmenistan maý aýynyň aýagynda “Türkmenistan” howa ýollarynyň Aşgabat-Dubaý ugry boýunça, iýun aýynyň başynda Aşgabat-Kazan ugry boýunça yzygiderli uçuşlaryny dikeltdi; iýul aýynda bolsa Moskwa bilen aralykdaky uçar gatnawy dikeldildi. Mundan başga, türkmen howa ýollary awgustdan bäri Frankfurt, Germaniýa bilen aradaky uçar gatnawyny hem täzeden ýola goýdy.
Türkmenistanyň 2020-nji ýylyň martynda, pandemiýa sebäpli ýatyran uçar gatnawlaryny wagty bilen açmazlygy daşary ýurtlarda galan ýüz müňlerçe türkmenistanly, olaryň maşgala agzalary üçin uly kynçylyklary döretdi.
