Ukrainanyň prezidenti Wolodymyr Zelenski, Kiýewe harby taýdan kömek berýän döwletleriň Ramştaýn atlandyrylýan toparynyň 6-njy sentýabrdaky maslahatyna gatnaşar. Bu barada Germaniýanyň Spiegel neşiri habar berýär.
5-nji sentýabrdaky maglumatda bellenilşi ýaly, ABŞ-nyň Germaniýanyň günbataryndaky Ramştaýn harby-howa bazasynda geçiriljek maslahatyň dowamynda, Zelenskiýiň has köp ýaraglary, hususanda uzak aralyga niýetlenen raketalary we howa hüjüminden goranyş ulgamlary soramagyna garaşylýar.
Russiýanyň 2022-nji ýylda Ukraina garşy doly gerimli urşy başlandan soň, ABŞ Kiýewi ýarag bilen üpjün etmek boýunça, pikirdeş döwletleriň Ramştaýn toparyny esaslandyrdy. Dowamly duşuşyklary geçirýän bu toparyň düzümine eýýäm 50 töweregi ýurt girýär.