Ysraýylyň 4-nji noýabrda uran howa zarbalary Gazada azyndan 16 palestinalyny öldürdi, ýaşaýjylar anklawyň demirgazygyndaky ýerleriň raýatlardan saplanmagyna gönükdirilen täze howa we gury ýer hüjümleriniň edilmeginden gorkdular.
BMG-niň Palestina bosgunlar gullugy, UNRWA Ysraýylyň Gaza goýberilýän kömek ulaglarynyň sanyny azaldýandygyny, bu çäklendirmäniň azyk, derman we beýleki zerur enjamlaryň ýetmezçiligini artdyrýandygyny aýtdy, emma Ysraýyl muny ret etdi.
Soňky ganly wakada, 4-nji noýabr güni giçlik Gazanyň demirgazygyndaky Beýt Lahiýa garşy edilen hüjümde birnäçe adam öldi ýa-da ýaralandy. Medisina işgärleri bir gün öň bu şäheriň iki binasyna edilen hüjümde ýedi adamyň ölendigini aýtdylar.
Gaza zolagynyň merkezinde ýerleşýän Zawaýda urlan zarba dört adamy öldürdi, anklawyň merkezi we günorta bölegine urlan aýry-aýry zarbalarda ýene bäş adam öldürildi diýip, medisina işgärleri “Roýters” habar gullugyna aýtdylar.