Ukrainanyň premýer-ministri Denys Şmyhal 10-njy sentýabrda üç aý mundan ozal Şweýsariýada geçirilen parahatçylyk sammiti bilen deňeşdirilende has köp gatnaşyjysy boljak ikinji parahatçylyk sammitini geçirmek babatynda umyt beýan etdi.
Şmyhal geçen hepde hökümetde bolup geçen kadr çalşygyndan soňra geçiren ilkinji metbugat ýygnagynda azyndan 150 ýurduň gatnaşmagyna bil baglanýan nobatdaky parahatçylyk sammitini ýylyň ahyryna çenli guramalaşdyrmaga umyt bildirýändigini aýtdy.
Russiýanyň 2022-nji ýylyň başlarynda girişen giň gerimli çozuşyndan bäri ot açyşy bes etmek boýunça geçirilen iň iri jemgyýetçilik tagallalarynyň çäklerinde, 80 ýurt iýun aýynda Şweýsariýada geçirilen parahatçylyk sammitine gatnaşdy. Bu ýygnagyň dowamynda Kiýew Ukrainanyň çäk bitewiliginiň islendik parahatçylyk ylalaşygynyň esasyny emele getirmelidigini aýtdy.
Rus resmileri bu ýygnaga çagyrylmady, Hytaý bolsa, gatnaşmakdan ýüz öwürdi.
Şmyhal Kiýewde geçiren metbugat ýygnagynda Ukrainanyň soňky bir ýylyň dowamynda ýarag önümçiligini ep-esli artdyrandygyny aýtdy hem-de rus güýçlerine garşy durmakda möhüm serişde bolan dronlaryň bir million sanysynyň ýylyň aýagyna çenli öndürilmegine umyt bildirdi.