Russiýanyň basyp alan ýerlerinde ýaşaýan on iki ukrain çagasy Ukraina gaýtarylyp getirildi diýip, Ukrainanyň prezident diwanynyň başlygy Andriý Ýermak habar berdi.
"Halas edilenleriň arasynda çydap bolmajak synaglary başdan geçiren çagalar bar: basyp alyş lukmançylygynyň geleňsizligi sebäpli ejesini ýitiren 16 ýaşly gyz, rus goşunyna çagyrylan 17 ýaşly ýetginjek, çagalar "bilim lagerlerinde" ruslaşdyrma synanyşygyna sezewar edilenler, rus raýatlygyny almakdan ýüz öwrendigi sebäpli kakasyndan aýryljak bolnan sekiz ýaşly gyz" diýip, Ýermak ýazdy.
Russiýa giň gerimli çozuşa başlaly bäri ýüzlerçe müň ukrain çagasy öýlerini terk etmäge mejbur boldy. Olaryň bir bölegi atyşyklar sebäpli ýa-da frontda ýogalmaklary netijesinde ene-atasyny ýitirdi, beýleki bir bölegi basylyp alnan ýerlerden çykyp gitmäge mejbur boldy.
“Bring Kids Back”, “Çagalary yzyna getiriň” toparynyň maglumatlaryna görä, uruş başlanaly bäri 19,546 çaga Ukrainadan bikanun çykaryldy.
Bu çagalaryň azyndan 2444 sanysy Belarusa äkidildi. Bular diňe resmi taýdan ýazgy edilen çagalar baradaky sanlar. Russiýa hem öz gezeginde Ukrainadan çykarylan 700 müň çaganyň gürrüňini edýär.
Olardan 1037 çagany watanyna gaýataryp getirmek başartdy, 2024-nji ýylda takmynan 600 watanyna gaýtaryldy.
Haagadaky Halkara Jenaýat Kazyýeti 2023-nji ýylyň 17-nji martynda, Ukrainanyň basylyp alnan ýerlerindäki çagalary bikanun deportasiýa edendikleri üçin, Wladimir Putini we Mariýa Lwowa-Belowany tussag etmek kararyny çykardy.