Türkmenistanda ýanwar aýynyň başynda duýdansyz gymmatlan alkogolly içgileriň bahasy gaýtadan arzanlady. Olaryň bahasy takmynan öňki derejesine gaýdyp geldi.
“Spirtli içgileri satýan dükanlarda ozal 20-30 manatdan 30-40 manada gymmatlan araklar ýene-de öňki bahasyndan satylyp başlandy. 80 manada gymmatlan araklar hem öňki bahasyndan, ýagny 60-70 manatdan satylýar” diýip, Azatlyk Radiosynyň habarçysy 22-nji ýanwarda Balkan welaýatyndan maglumat berdi.
Ýatlatsak, 9-njy ýanwarda Lebapdaky we Marydaky habarçylarymyz täze ýylyň başyndan alkogolly içgileriň bahasynyň duýdansyz 20-30 göterim gymmatlandygyny we munuň esasan ýerli çakyr kärhanalarynyň önümlerinde göze ilýändigini habar berdiler.
Habarçymyz bilen anonim şertde söhbetdeş bolan balkanly telekeçileriň birnäçesi bahalaryň gaýtadan aşakladylmagynyň sebäbini söwdanyň pes bolmagy we “döwlet tarapyndan berlen tabşyryk” bilen düşündirýär.
“Araklar gymmatladylandan soň, alkogola tabyn adamlar öňküsi ýaly günde 0,5 litr däl-de, takmynan üç gününe 0,5 litr arak satyn alyp başladylar. Bu söwdanyň we girdejiniň peselmegine getirdi. Bu alkogol söwdasyny edýän emeldarlaryň bähbidine bolmady. Sebäbi bu ýagdaý alkogola tabyn adamlaryň azalmak ähtimallygyna hem getirip bilerdi. Şol sebäpli häkimiýetler alkogoly ýene öňki bahasyna getirmegi tabşyrdylar” diýip, ýagdaýlardan habarly balkanly telekeçi belledi.
Azatlyk bu aýdylanlar barada Balkanyň häkimiýetlerinden, şol sanda söwda edarasyndan kommentariý alyp bilmedi.
Ýöne alkogolly içgileriň arzanlandygy we olary öňki bahasyna getirmek üçin ýokardan tabşyrygyň berlendigi baradaky maglumaty, garaşsyz neşir “Türkmenistanyň Hronikasy” hem tassyklaýar.
Neşir öz ýurt içindäki habarçylaryna salgylanyp, 19-njy ýanwarda çap eden maglumatynda ýurduň Söwda we daşary ykdysady gatnaşyklar ministrliginiň alkogolly içgileriň bahasyny arzanlatmak barada buýruk berendigini aýdýar.
Azatlygyň bu barada ýurduň agzalýan ministrliginden telefon arkaly kommentariý almak synanyşyklary oňyn netije bermedi.
Ýurtda alkogolly içgileriň bahasynyň duýdansyz gymmatlamagy we indem gaýtadan arzanladylmagy hem-de bularyň sebäpleri barada ilata aç-açan resmi düşündiriş berilmeýär. Bu barada ýurduň berk döwlet gözegçiligindäki media serişdelerinde hem hiç hili maglumat göze ilmeýär.
Ýöne bu waka, ýurtda öndürilýän alkogolly içgileriň goşmaça tölegleriniň möçberiniň artdyrylan mahalyna gabat geldi.
Türkmenistanyň Adalat ministrliginiň websahypasynda çap edilen ýurduň “Salgytlar hakyndaky” kanunynda 2024-nji ýylyň 1-nji ýanwaryndan başlap, ýurtda piwonyň goşmaça töleginiň möçberi onuň bahasynyň 34,5 göterimine barabar boldy.
Tebigy üzüm çakyry, güýçli spirtli içgiler, likýorlar we düzüminde alkogol bolan gaýry alkogolly içgiler (üzüm löderesinden başga), şeýle hem düzüminde alkogol bolan çakyr serişdeleri üçin goşmaça tölegiň möçberi:
- Düzüminde 20 göterim we şoňa çenli alkogol bolan içgiler üçin bahasynyň 44,85 göterimine
- Düzüminde 20-den 30 göterime çenli we 30 göterim alkogol bolan içgiler üçin bahasynyň 70, 15 göterimine
- Düzüminde 30 göterimden ýokary alkogol bolan içgiler üçin bahasynyň 88,55 göterimine barabar boldy.
“Turkmen.news” neşiriniň “online.zakon.kz” websahypasyna salgylanyp, 9-njy ýanwarda çap eden maglumatyna görä, mundan ozal bu görkezijiler degişlilikde 30, 39, 61 we 77 göterime barabardy.
Türkmenistanda alkogol önümleriniň bahasy soňky gezek geçen ýylyň başynda gymmatlapdy. Bu waka, ýurtda daşary döwletlerden getirilýän alkogol önümleri üçin salynýan gümrük tölegleriniň möçberiniň tas iki esse ýokarlanmagy bilen utgaşypdy.
Türkmenistanyň hökümeti alkogol önümleri boýunça import-eksport maglumatlaryny, şeýle-de spirtli içgileriň harçlanyşy boýunça sanlary, alkogola ýolugan adamlaryň näçesiniň hasaba alnandygyny äşgär etmeýär. Azatlygyň munuň bilen bagly soraglaryny hem jogapsyz goýýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum