Türkmenistanyň Halk maslahatynyň başlygy Gurbanguly Berdimuhamedow 28-nji awgustda Tährana iş saparyna baryp, Eýranyň täze saýlanan prezident Masud Pezeşkian we ruhy lider Aýatolla Seýed Ali Hoseýni Hameneýi bilen gepleşik geçirdi diýip, türkmen metbugaty habar berýär.
Metbugatda taraplaryň gol çeken ylalaşyklarynyň sanawy çap edildi:
- Türkmenistanyň Daşary işler ministrligi bilen Eýran Yslam Respublikasynyň Daşary işler ministrliginiň arasynda 2025-2026-njy ýyllar üçin hyzmatdaşlyk etmek hakynda Maksatnama;
- Türkmenistanyň Türkmenbaşy Halkara deňiz porty bilen Eýran Yslam Respublikasynyň Amirabad portunyň arasynda doganlyk port gatnaşyklary barada özara düşünişmek hakynda Ähtnama;
- Tebigy gaz babatda hyzmatdaşlygy ösdürmek barada «Türkmengaz» döwlet konserni bilen Eýranyň milli gaz kompaniýasynyň arasynda özara düşünişmek hakynda Ähtnama;
- Türkmenistanyň Döwlet gümrük gullugy bilen Eýran Yslam Respublikasynyň Gümrük edarasynyň arasynda hyzmatdaşlygyň geljekde çuňlaşdyrylmagy we giňemegi boýunça bilelikdäki çäreleriň 2025-2026-njy ýyllar üçin Maksatnamasy.