Türkmenistanyň prezidenti Serdar Berdimuhamedow üçünji gün Aşgabatda Türkiýäniň goranmak ministri Ýaşar Güler bilen duşuşyp, iki ýurduň arasyndaky harby hyzmatdaşlygy pugtalandyrmagyň mümkinçiliklerini ara alyp maslahatlaşdy.
Habarda anyklaşdyrylman aýdylmagyna görä, Watan goragçylarynyň hünärlerini kämilleşdirmek, harby işiň öňdebaryjy usullaryny öwrenmek boýunça, türkmen harbylary Türkiýede geçirilýän okuwlara gatnaşýar, ýurduň milli goşunynyň maddy-enjamlaýyn üpjünçiligini döwrebaplaşdyrmak, täze tehnologiýalary ornaşdyrmak ulgamynda yzygiderli ýagdaýda tejribe alşylýar.
Türk ministri şol gün Halk maslahatynyň başlygy Gurbanguly Berdimuhamedow, Döwlet howpsuzlyk geňeşiniň sekretary, goranmak ministri bilen hem duşuşdy. Türkmen metbugaty resmi habarda ýurduň goranmak ministriniň adyny aýtmaýar.
Gepleşiklerde goranmak ulgamynda alnyp barylýan gatnaşyklary mundan beýläk-de ösdürmegiň, hususan-da, sanly tehnologiýalar boýunça hyzmatdaşlygy işjeňleşdirmegiň ara alnyp maslahatlaşylandygy bellenýär.
