29-njy awgustda Türkiýäniň daşary işler ministri Hakan Fidan, soňky bäş ýylyň içinde birinji gezek, Ýewropa Bileleşiginiň ministrleriniň Brýusseldäki duşuşygyna gatnaşdy. Türk diplomaty munuň Ankaranyň Ýewropa Bileleşigi bilen çylşyrymly gatnaşyklaryny gowulandyrylmagy ugrunda öňe gidişlik boljakdygyna umyt edýändigini aýtdy.
Türkiýäniň Ýewropa Bileleşiginiň düzümine girmek baradaky tas 20 ýyllyk arzasy, Bileleşigiň Türkiýäniň adam hukuklary baradaky aladalary, şeýle-de Ortaýer deňzi yklymy we Kipr üstündäki dawalary sebäpli, togtadylypdy.
Şol bir wagtda, Ýewropa Bileleşigi NATO-nyň agzasy Türkiýäniň hemaýatyna, hususan-da migrasiýa meseleleri babatynda garaşly bolup durýar.
2019-njy ýylda Ýewropa Bileleşiginiň agzasy Kipr bilen Türkiýäniň arasyndaky dartgynlylyklaryň netijesinde, Bileleşik Ankara bilen käbir dialog kanallaryny kesipdi.
Gatnaşyklar 2021-nji ýyldan bäri, haçanda ýokary derejeli gepleşikler ýaňadandan ýola goýlandan soň, gowulaşyp başlady.