14-nji oktýabrda Owganystanyň “Talyban” dolandyryjylarynyň ahlak ministrligi habar serişdelerinde ähli diri jandarlaryň şekillerini çap etmegi gadagan edýän düzgüniň ornaşdyryljakdygyny we žurnalistlere bu kadany berjaý etmekleri barada duýdurylandygyny mälim etdi.
“Bu kanun tutuş Owganystana degişli... bu tapgyrlaýyn ýagdaýda durmuşa geçiriler” diýip, Päk ahlagy wagyz etmek we azgynçylygyň öňüni almak boýunça ministrligiň metbugat wekili Saiful Islam Khyber AFP habar gullugyna aýtdy. Ol jandarlaryň suratlaryny çap etmegiň Yslamyň kadalaryna çapraz gelýändigini nygtady.
Soňky döwür “Talyban” hökümetiniň adalat ulgamy Yslamyň kadalarynyň berk görnüşli düşündirişlerini resmileşdirýän täze kanunlary yglan edýärler.
Soňky mälim edilen kanunyň düzgünleriniň berjaý edilişine entek berk gözegçilik edilmeýär. “Talybanyň” resmileri sosial ulgamlarda adamlaryň şekillerini yzygiderli paýlaşmagyny dowam etdirýärler.