Täjigistanyň ýollarynda elektrik awto ulaglaryň sanynyň artmagy dowam edýär. Şu ýylyň birinji ýarymynda, Täjigistan 800-e golaý elektrik bilen ýöreýän ulaglary import etdi diýip, ýurduň transport ministri Azim Ibrohim Duşanbede geçirilen metbugat ýygnagynda aýtdy.
Täjigistan Respublikasynyň Transport ministrliginiň ýolbaşçysynyň bellemegine görä, häzirki wagtda Täjigistanyň ýollarynda, elektrik motorly 1600 sany ulag hereket edýär.
Onuň sözlerine görä, Täjigistanda elektrik ulaglarynda ulanylýan litiý akkumulýatorlary gaýtadan özleşdirilýär. Akkumulýator iş mümkinçiligini gutarandan soňra, ony gaýtadan ulanmagyň üç sany mümkinçiligi bolup biler – gaýtadan bejermek, ikinji gezek ulanmak hem-de ýaňadan diklemek. "Biziň akkumulýatorlary gaýtadan işläp bejerýän ussalarymyz ýok, şonuň üçin diňe gaýtadan işlemek barada gürrüň edip bilýäris" diýip, Azim Ibrohim sözüni dowam etdirdi.
2022-nji ýylyň ýanwar aýyndan başlap, Duşanbe şäheriniň köçelerinde, elektrik taksileri hereket edip başlady. Ýerli ýaşaýjylar oňa edilýän çykdajylary göz öňünde tutup, elektrik motorly taksi hyzmatlary adaty taksilerden has pes bolar diýip hasap edýärdiler. Elektrik taksi ulaglarynyň sürüjileri bolsa hyzmatyň nyrhlarynyň olar tarapyndan däl-de, kompaniýanyň ýolbaşçylary tarapyndan kesgitlenýändigini aýdýarlar. Taksi hyzmatlaryny üpjün edýän kompaniýalar bu mesele barada kommentariýa bermekden ýüz öwürdiler.
Transport ministrliginiň ýolbaşçysy Täjigistanda elektrik ulaglaryny ulanmak üçin, infrastrukturany we beýleki zerur şertleri döretmek boýunça, ýörite meýilnamanyň kabul edilendigini aýtdy. Bu programmanyň çäginde, Duşanbe şäherinde 169 sany kuwwat beriji beketleri ýerleşdirmek göz öňünde tutulypdyr. Häzirki wagtda paýtagtda şeýle beketleriň diňe 36-sy bar. Sürüjileriň aýtmagyna görä, bu örän az. Olaryň esasy kynçylyklarynyň biri akkumulýatory kuwwatlandyrmakda gidýän wagtyň köplügi; adaty maşynlary ýangyç bilen doldurmak ýüz ugra bitýän bolsa, akkumulýatory kuwwatlandyrmak üçin, 40-45 minutdan, bir sagada çenli wagt gidýär. “Şäherde kuwwat beriji beketler örän az. Käte sagatlap nobata garaşmaly bolýar” diýip, elektrik ulag sürüjisi Ibrohim Nosirjon aýdýar.
2021-nji ýylyň dekabrynda, Täjigistanyň prezidenti Emomali Rahmon ýurda getirilýän elektrik ulaglaryndan; şol sanda elektrik awto ulaglardan, elektrik maşynlaryndan, elektrik awtobuslardan, trolleýbuslardan we ş. m. salgytlaryň we gümrük paçlarynyň, şeýle hem beýleki ýygym salgyt tölegleriniň doly ýatyrylmagyny teklip etdi. Ol hökümet baştutanyna ýurtda şeýle ulag serişdelerini ulanmak üçin, infrastrukturany we beýleki zerur şertleri üpjün etmek boýunça çäreleri görmegi tabşyrdy.
Elektrik ulaglaryny kuwwatlandyrýan beketlerde 1 kWh elektrik energiýasynyň bahasy 1 somoni bilen kesgitlenildi. Täjigistanyň maşyn bazarlarynda şeýle maşynlaryň bahasy 300 müň somonä çenli satylýar. Elektrik ulaglarynyň eýeleri özlerine beýle maşynlary ulanmagyň arzandygyny, howpsuzdygyny we daşky gurşawa ýaramaz täsir etmeýändigini aýdýarlar. Olaryň sözlerine görä, bu çäreleriň esasynda, Täjigistanyň hökümeti elektrik ulaglarynyň getirilmegine itergi bermek isleýär.
Täjigistanda soňky 30 ýylyň dowamynda, ýurduň häkimiýetleriniň ilaty bökdençsiz elektrik energiýasy bilen üpjün etmek meselesini çözüp bilmedik wagtynda, elektrik ulaglarynyň sany artýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum