Täjigistanyň adam hukuklary boýunça ygtyýarly wekili Umed Bobozoda Russiýada täjik migrantlaryna ýowuz daralmagy bilen baglylykda çynlakaý alada beýan etdi.
Bobozoda özüniň russiýaly kärdeşine ýollan hatynda Russiýanyň kanun-goraýjy gulluklaryny migrantlara garşy bikanun çäreleri, şol sanda fiziki sütemleri, esassyz tussag etmeleri dagy ulanmakda aýyplady. Ol martda Moskwanyň golaýyndaky “Crocus City Hall” söwda merkezine amala aşyrylan terror hüjümi bilen ilteşikli täjik raýatlarynyň saklanmagyndan soň, bu ýagdaýlaryň hasam ýitileşendigine ünsi çekdi.
Hüjümden bäri 20 müňden gowrak täjik raýaty deportasiýa edildi, Russiýada galýan köp sanly beýlekilere hem ýowuz daralyp başlandy.
Ol saklanan täjik raýatlarynyň, şol sanda aýallaryň we çagalaryň esasy hajat zerurlyklarynyň hem berjaý edilmeýändigini belledi.