11-nji iýulda Russiýanyň maliýe gözegçisi Rosfinmonitoring Ýuliýa Nawalnaýany özüniň “terrorçylar we ekstremistler” sanawyna goşdy. Ýuliýa merhum oppozisiýa lideri we korrupsiýa garşy göreşiji Alekseý Nawalnynyň dul aýalydyr.
Mundan iki gün öň, Moskwanyň sudy ekstremistiki toparyň hereketlerine gatnaşmak aýyplamasy esasynda, Nawalnaýanyň tussag edilmegi boýunça hem order çykarypdy.
Bu ädim Nawalnaýanyň iki hepde töweregi ozal düýbi Nýu-Ýorkda ýerleşýän “Human Rights Foundation” (“Adam Hukuklary boýunça Fonduň”) başlyklygyna saýlanmagyndan soň amal edildi. Bähbit aramaýan bu gurama dünýä boýunça adam hukuklaryny ýaýratmak we olary goramak ugrunda tagalla edýär.