Russiýadan we Birleşen Ştatlardan bolan diplomatlar özleriniň degişli diplomatik missiýalary boýunça bar bolan dawalary ara alyp maslahatlaşmak üçin, 27-nji fewralda Türkiýäniň Stambul şäherinde duşuşarlar. Iki ýurduň arasyndaky ikitaraplaýyn dialog Ukraina urşuny soňlamakda möhüm bolup durýar.
ABŞ-nyň döwlet sekretary Marko Rubionyň hem-de Russiýanyň daşary işler ministri Sergeý Lawrowyň ýolbaşçylygyndaky delegasiýalar geçen hepde Saud Arabystanynda geçirilen gepleşiklerde diplomatik missiýalaryň işini ara alyp maslahatlaşmak barada ylalaşdylar.
Prezident Donald Tramp, ABŞ-nyň Russiýany, Ukrainada alyp barýan urşy zerarly, üzňeleşdirmek syýasatyny üýtgedip, muňa derek, urşy tiz wagtda soňlamaga ünsi gönükdirip başlandan soňra, ABŞ we rus wekilleriniň arasynda gepleşikler bolup geçdi. Riýadda geçirilen ikitaraplaýyn gepleşikler ABŞ Ukrainanyň hem-de Ýewropanyň bähbitlerine ters gelýän ylalaşyklary gazanar diýen aladalara ýol açdy.
ABŞ-nyň Döwlet departamenti Stambulda geçiriljek gepleşikleriň Ukraina bilen bagly maslahatlaşmalary öz içine almajakdygyny, ýöne şol bir wagtda, bu gepleşiklere Moskwanyň gatnaşyk islegleriniň synaga salynmagy hökmünde garaljakdygyny aýtdy.
Rubio 26-njy fewralda beren bir interwýusynda Birleşen Ştatlaryň Russiýanyň urşy soňlamak babatynda akýüreklidigini ýa-da däldigini heniz bilmeýändigini, ýöne muny anyklajakdygyny aýtdy.
Döwlet departamentiniň metbugat sekretary “Roýterse” Stambuldaky gepleşikleriň gün tertibinde syýasy ýa-da howpsuzlyk meseleleriniň gozgalmajakdygyny aýtdy.