ABŞ-nyň Döwlet sekretary Marko Rubio ABŞ-nyň prezidenti Donald Tramp bilen Russiýanyň prezidenti Wladimir Putiniň arasynda bolup biljek duşuşygyň Ukrainadaky söweşi bes etmekde gazanyljak öňegidişlige bagly boljagyny 20-nji fewralda aýtdy.
Rubionyň beren interwýusynda aýtmagyna görä, ol 18-nji fewralda Saud Arabystanynda Russiýanyň daşary işler ministri Sergeý Lawrow bilen geçiren duşuşygynda oňa "gepleşikleriň näme barada boljakdygyny bilýänçäk" sammitiň bolmajakdygyny aýdypdyr.
Şeýle ýygnaklar, adatça, "haýsydyr bir netijäniň ýa-da käbir öňegidişligiň gazanylandygy anyklanýança" geçirilmeýär diýip ABŞ-nyň döwlet sekretary aýtdy.
Riýadda geçirilen gepleşiklerde Russiýa we ABŞ Russiýanyň 2022-nji ýylyň fewral aýynda Ukraina hüjüm etmeginden soň başlanan urşy bes etmegiň ýoluny tapmak boýunça gepleşik geçirmek üçin topar döretmek barada ylalaşdylar. Putin bilen Tramp ikisi hem sammit geçirmek isleýändiklerini mälim etdiler.
"Şeýlelikde bu duşuşygyň haçan boljakdygy, esasan, Ukrainadaky urşy bes etmekde haýsydyr bir öňegidişligi gazanyp bilmegimize, muňa mümkinçiligiň bolmagyna bagly bolar we şol duşuşyk ylalaşygy gol çekip, tassyklap biler. Meniň pikirimçe hemmeler prezident Trampyň parahatçylyk dörediji bolandygyny dabaralar"- diýip, Mark Rubio aýtdy.
Rubionyň amerikaly žurnalist Katrin Herrij bilen bu söhbetdeşligi X-da çap edildi.
Tramp urşy bes etmek üçin gyssagly şertnama baglaşmagyň tarapyndan çykyş edýär. Ýöne onuň bu taktikasy Ukrainany we Ýewropa ýurtlarynyň hökümetlerini aladalandyrdy, sebäbi olar öz howpsuzlyk bähbitlerini äsgermeýän ylalaşygyň Russiýa we ABŞ-nyň arasynda baglaşylmagynyň ähtimallygyndan howatyrlanýarlar.
Tramp 19-njy fewralda prezident Wolodymyr Zelenskini "diktator" diýip atlandyrmak bilen Ukrainany we Ýewropadaky ýaranlaryny geň galdyrdy we Russiýanyň goşun salmagynda Ukrainany günäkärledi.
Lawrow 20-nji fewralda Günorta Afrikada 20 ýurtdan ybarat toparyň mejlisine gatnaşdy we Hytaýyň Daşary işler ministri Wang Ýi bilen duşuşdy.
Russiýanyň Daşary işler ministrliginiň ýaýradan beýanatyna görä, Lawrow Russiýanyň Hytaý bilen gatnaşyklarynyň "halkara ýagdaýyny durnuklaşdyrmakda we umumy gapma-garşylyga geçmeginiň öňüni almakda möhüm ähmiýete eýe bolandygyny we dowam edýändigini" aýtdy.
Wang, "Uly 20" guramasynyň beýleki daşary işler ministrlerine Ukraina üçin "parahatçylyga penjire" açylýandygyny we Hytaýyň "parahatçylyk üçin ähli tagallalary" goldaýandygyny aýdypdyr. Bu barada Hytaýyň Daşary işler ministrliginiň beýanatynda habar berildi.
"Uly-20" toparyny dünýäniň 19 sany esasy ykdysadyýeti, Ýewropa Bileleşigi we Afrika ýurtlary düzýär. Global ykdysady durnuklylyga esas döretmek we hyzmatdaşlygy ösdürmek maksadyna eýerýän, ösen we ösýän ýurtlary birleşdirýän guramanyň çalyşyp durýan prezidentligini häzir Günorta Afrika alyp barýar.
Rubio ABŞ-nyň Günorta Afrika bilen dartgynlylygy sebäpli "Uly20" toparynyň iki günlük ýygnagyna gatnaşmazlyk kararyna geldi. Trampyň administrasiýasy Günorta Afrikanyň käbir syýasatçylarynyň ABŞ barada eden çykyşlaryny anti-amerikan häsiýetli diýip, hasap etdi. Duşuşyga ABŞ tarapyndan onuň Günorta Afrikadaky ilçisi Dana Braun wekilçilik etdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum