Türkmenistanyň prezidenti Serdar Berdimuhamedow Gazagystana sapar edýär. Ol bu ýerde Merkezi Aziýa ýurtlarynyň döwlet baştutanlarynyň we Germaniýanyň Federal Kansleriniň ikinji duşuşygyna gatnaşar diýip, türkmen metbugaty habar berdi.
Prezidentiň uçary Astananyň Nursultan Nazarbaýew adyndaky halkara howa menzilinde gondy, bu ýerde «Merkezi Aziýa – Germaniýa» sammitine gatnaşýan ýurtlaryň döwlet baýdaklary galdyryldy.
Türkmen lideri Gazagystanyň premýer-ministri Olžas Bektenow we beýleki resmi adamlar tarapyndan garşy alyndy.
Habarda Türkmenistanyň netijeli halkara dialoga ygrarlydygy, munuň ählumumy ösüşiň möhüm wezipelerini çözmäge hem-de ählumumy bähbitlere laýyklykda özara ynanyşmak ýagdaýyndaky hyzmatdaşlygy ýola goýmaga ýardam edýändigi bellenýär.