Pakistanyň iň iri şäheri Karaçide aeroportuň golaýynda bolan partlamada Hytaýyň iki raýaty heläk boldy. Hytaýyň ilçihanasy muny “terror hüjümi” diýip atlandyrdy.
Hüjümiň jogapkärçiligini Buluç Azatlyk Armiýasy atly separatistik topar öz üstüne aldy.
Ilçihananyň maglumatyna görä, partlama 6-njy oktýabrda giçlik hytaýly işçileriň aeroportdan ulagly gaýdyp barýan pursady ýüze çykypdyr.
Hytaýly işçiler Pakistanda kömürde işleýän iki sany elektrik desgasynyň gurluşygyny alyp barýardylar.
Pakistanda onlarça müň hytaýly işçi zähmet çekýär. Olaryň aglabasy Pekiniň ilerledýän "Bir guşak, bir ýol" atly milliardlarça dollarlyk taslamasynyň çägindäki proýektleri durmuşa geçirýärler.