Özbegistanyň döwlet mediasy Gazagystanyň öňki prezidenti Nursultan Nazarbaýewiň geçen hepdede Buhara şäherine sapar edip, özbek lideri Şawkat Mirziýoýew bilen “näresmi” gepleşikleri geçirendigini habar berdiler.
Nazarbaýew 2022-nji ýylda Gazagystanda bolup geçen hökümete garşy görlüp-eşidilmedik protestlerden soňra, syýasy sahnadan hem-de jemgyýetçilik durmuşyndan ýitirim boldy.
Ne Nazarbaýewiň web sahypasy, ne-de onuň wekilleri 6-njy sentýabrda bolup geçen sapar barada kelam agyz gürrüň etdi.
Gazak mediasy hem, görnüşine görä, bu sapar barada habar bermedi.
Nazarbaýew bilen Mirziýoýewiň nämeleri maslahat edendikleri nämälim galýar.
84 ýaşly Nazarbaýew 2019-njy ýylda özüniň uzak wagtlyk ýarany Kasym-Žomart Tokaýewi özüne orun tutar belläp, prezident wezipesinden çekildi.
Nazarbaýew hem-de onuň urugy 2022-nji ýylyň ýanwar aýynda bolup geçen hökümete garşy görlüp-eşidilmedik protestlerden soňra, Merkezi Aziýanyň nebite baý ýurdunda öz täsirini ýitirdiler.