Eýran asylly german raýaty Jamşid Şarmahd gapma-garşylykly terrorçylyk aýyplamalarynda aýyplanyp, jezalandyrylyp öldürileninden soň, Germaniýanyň daşary işler ministri 28-nji oktýabrda Eýranyň “adamkärçiliksiz režimini” ýazgaryp çykyş etdi.
Eýran kazyýetiniň “Mizan” habar gullugy Şarmahda garşy ölüm jezasynyň 28-nji oktýabrda, "Ýokary kazyýet oňa çykarylan ölüm hökümini tassyklanyndan soň" ýerine ýetirilendigini habar berdi.
Germaniýanyň daşary işler ministri Annalena Baerbok Eýran režiminiň 69 ýaşly Şarmahdy jezalandyryp öldürmegini berk ýazgaryp eden beýanatynda munuň “Tähranda nähili adamkärçiliksiz režimiň höküm sürýändigini ýene-de bir gezek görkezendigini, bu režimiň ýaşlara, öz ilatyna we daşary ýurt raýatlaryna garşy ölümi ulanýandygyny” aýtdy.
Baerbok Berliniň Tährana "nemes raýatynyň jezalandyrylyp öldürilmeginiň çynlakaý netijeleriniň boljakdygyny” gaýta-gaýta duýdurandygyny hem sözüne goşdy.