Aziýa oýunlarynda Türkmenistanyň ýeke-täk kümüş medalyny gazanan Tejen Tejenow Azatlyk radiosynyň bu ýaryşa gatnaşan pälwanlaryň neşe barlaglarynyň netijesi barada beren habaryna Instagram arkaly gödek sözler bilen, hapa sögünip reaksiýa bildirdi.
Azatlyk radiosy ondan gatnaşan ýaryşy ýa-da neşe barlagynyň netijesi barada hiç bir pikir soramandy, emma ol özüniň neşe barlagynyň netijesi barada türkmen dilinde çap edilen habara gahar edip, žurnalistleriň maşgala agzalaryny kemsitmäge synanyşdy we, “Ýene näme edip bilýäňiz, ediň” diýip, özüni pidanyň, bilkastdan ýamanlyk ediljek bolunýan şahsyň ornunda goýdy.
30 ýaşyndaky türkmen pälwanynyň doping synagynda görkezen oňyn netijeleri sebäpli ýaryşdan wagtlaýyn çetleşdirilendigi baradaky habar Haňžou şäherindäki esasy metbugat merkeziniň habarçysy tarapyndan 6-njy oktýabrda çap edildi we dünýäniň köp sanly habar serişdelerinde, dürli dillerde okyjylara, diňleýjilere ýetirildi.
Geçen aýyň aýagynda Tejen Tejenow bilen Aýnur Amanowanyň ХIХ tomusky Aziýa oýunlarynyň çäginde başlanan kuraş ýaryşlarynda üstünlik gazanandygyny habar beren türkmen metbugaty, adatça bolşy ýaly, neşe barlaglarynyň netijeleri barada çykan habarlary öz okyjylaryna we resmilere ýetirmegi zerur hasaplamady.
Tejenow gürrüňi edilýän ýaryşda 90 kilogramdan ýokary agram derejesindäki ýaryşda gazagystanly Nurdaulet Žarylgapowy, gyrgyzystanly Bekbolot Toktogomowy, koreýaly Junýon Çony ýeňip, özbegistanly Muhsin Hisomiddinowdan ýeňildi we kümüş medala eýe boldy.
Emma, Halkara barlag gullugynyň maglumatyna görä (ITA), Tejenowyň şol gün geçirile neşe barlaglary oňyn netije görkezdi, ýagny onuň gadagan edilen neşe maddalaryny ulanandygy belli boldy.
Has anygy, ITA Tejenowyň degidroklorometil-testosteron metaboliti we metasteron metaboliti maddalary boýunça oňaýsyz netije görkezendigini, bu maddalary ulanyp gelendigini öňe sürdi.
Bu iki steroidiň ikisi hem Bütindünýä antidoping gullugynyň (WADA) gadagan edilen maddalarynyň sanawyna girýär diýip, habarda aýdylýar.
Tejenow öz Instagram sahypasynda bu netijeler, ýaryşlara gatnaşmagynyň wagtlaýyn togtadylmagynyň sebäbi barada hiç zat aýtmaýar.
Haňžoudaky Aziýa oýunlarynda geçirilen doping barlaglary jemi bäş türgeniň gadagan edilen maddalary ulanandygyny ýüze çykardy. Şol bir wagtda, türgenlere B nusgasynda barlag geçirilmegini talap etmek mümkinçiligi berildi. Tejenowyň bu mümkinçilikden peýdalanyp-peýdalanmandygy belli däl.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.
Forum