ABŞ araçylary Ysraýyl bilen Liwanyň radikal topary Hezbullanyň arasyndaky söweş hereketlerini, 60 günlük ýaraşykdan başlap, togtatmak baradaky teklibiň üstünde işleýär diýip, “Roýters” habar gullugy çeşmelerine salgylanyp habar berdi.
Çeşmeleriň tassyklamagyna görä, iki aýlyk ýaraşyk möhleti BMG-niň Howpsuzlyk Geňeşiniň 2006-njy ýyldaky kararyny durmuşa geçirmek üçin ulanylmaly.
Bu kararda günorta Liwan döwlet gözegçiliginden daşardaky toparlanyşyklardan azat bolmaly diýilýärdi.
Çeşmeler bu ylalaşygyň başa barman biljekdigini boýun alýarlar.
Ak tamyň wekilleri 31-nji oktýabrda Liwan baradaky ylalaşygy ara alyp maslahatlaşmak üçin Ysraýyla geler.
Ysraýyl telewideniýesiniň 12-nji kanalynyň habaryna görä, Ysraýylyň premýer-ministri Benýamin Netanýahu we howpsuzlyk gullugynyň wekilleri ýurduň Hezbullaha garşy alyp baran kampaniýasynda öz maksatlaryna ýetendigi, indi konflikti syýasy taýdan çözmelidigi barada ylalaşyga gelipdir.
Emma muňa garamazdan, Ysraýylyň Liwandaky gury ýer operasiýasy dowam edýär.
Ysraýylyň Goranmak güýçleri 30-njy oktýabrda Liwanyň gündogaryndaky Baalbek şäheriniň we oňa golaý iki obanyň ýaşaýjylarynyň ewakuasiýa edilmegine çagyrdy.