Birleşen Ştatlar BMG-niň Howpsuzlyk geňeşiniň 28-nji oktýabrdaky mejlisinde Eýrana Ysraýyla ýa-da Ýakyn Gündogardaky ABŞ işgärlerine garşy mundan eýläk eden islendik agressiw hereketiniň "agyr netijeleriniň" boljakdygyny duýdurdy.
"Biz öz-özümizi goramak üçin hereket etmekde ikirjiňlenmeris. Goý, bu ýerde düşünmezlik bolmasyn. Birleşen Ştatlar ýagdaýyň mundan beýläk ýitileşmegini islemeýär. Biz munuň Ysraýyl bilen Eýranyň arasyndaky gönümel atyşygyň soňy bolmalydygyna ynanýarys" diýip, ABŞ-nyň BMG-däki ilçisi Linda Tomas-Grinfild aýtdy.
Howpsuzlyk Geňeşiniň mejlisi Ysraýyl 26-njy oktýabrda Eýranyň raketa zawodlaryna we beýleki ýerlerine zarba uranyndan soň geçirildi.
Ysraýyl Eýranyň 1-nji oktýabrda Ysraýyla atan 200-e golaý ballistik raketasy üçin ar alandygyny aýtdy.
Ýurduň ýokary lideriniň, görnüşinden, sebitiň iki garşydaşynyň arasyndaky jogap zarbalarynyň dowam etdirilmegini oňlamaýandygyna garamazdan, Tähran biraz öň Ysraýylyň Eýranyň harby nokatlaryna eden hüjümi üçin ar alynmagyna garaşyp biljekdigini duýdurdy.