Türkmen metbugaty Gazagystana uçar gatnawynyň ýola goýuljakdygyny habar berýär, ýöne bu gatnawyň haçan dikeldiljekdigini anyklaşdyrmaýar.
“Salam.news” neşiri prezident Kasym-Žomart Tokaýewiň sözlerine salgylanyp, Türkmenistan bilen Gazagystan Respublikasynyň arasynda yzygiderli howa gatnawlaryny gaýtadan dikeltmegiň üstünde işlenjekdigini habar berdi.
Bu habar Türkmenistanyň prezidenti Serdar Berdimuhamedowyň Gazagystana eden ilkinji döwlet saparynyň yz ýanyndan berildi.
Döwlet eýeçiligindäki media bu saparda dostlukly iki döwletiň arasynda birnäçe möhüm ylalaşygyň baglaşylandygyny, şol sanda uçar gatnawlaryny dikeltmegiň hem nazarda tutulýandygyny aýdýar.
Şeýle-de habarda «Türkmenistan» awiakompaniýasynyň Dubaý, Kazan, Moskwa, Frankfurt, Stambul we Minsk ugurlary boýunça yzygiderli ýolagçy gatnawlaryny amala aşyrýandygy bellenýär.
Türkmenistan pandemiýa çäklendirmeleri bilen baglylykda daşary dünýä bilen gatnaşyklary iň berk ýapan ýurtlaryň biri boldy.
Ýöne synçylar Aşgabadyň pandemiýadan öň hem köp syýahatçy, şol sanda etniki türkmenler üçin hem o diýen açyk bolmandygyny we munuň seýle bolmagynda hem galýandygyny belleýärler.