Özbegistanyň Kiýewdäki ilçihanasy ukrain häkimiýetlerini soňky günlerde ukrain ýaragly güýçleri tarapyndan saklanan we özlerini özbek raýaty hökmünde tanadan iki adam barada jikme-jik maglumat bermäge çagyrdy. Ol iki adam rus harby lybaslaryny geýipdir.
Ilçihana öz beýanatynda Ukrainanyň Daşary işler ministrligine soňky günlerde internetde paýlaşylan wideoda görkezilen iki adam barada "jikme-jik we subut edilen" maglumatlary soraýan hat iberendigini aýtdy.
Wideoda ukrain esgerleriniň Moskwanyň Ukrainada alyp barýan esassyz urşunda rus harbylaryna goşulan özbek raýatydygyny aýdýan iki adamy sorag edýändigi görünýär. Beýanatda Ukrainanyň, "ähli ýagdaýlar doly öwrenilýänçä, bu wideo barada tassyklanmadyk maglumatlary ýaýratmazlygy" soralýar.
Bu wideo 10-njy sentýabrda ukrain žurnalisti Ýuriý Butusowyň Ukrainanyň rus goşunlaryna garşy alyp barýan hüjümi baradaky habarynyň bir bölegi hökmünde çap edildi.
Onda görkezilýän iki adam ukrain goşunlary tarapyndan ýesir alnan rus esgerleriniň arasynda saklanypdyr we özleriniň özbegistanlydygyny, ýarym harby topara goşulmazlaryndan öň Moskwada ýaşandyklaryny aýdýarlar.