Türkmenistanda eýýäm birnäçe ýyl bäri tutuş ýurt boýunça goýy reňkli awtoulag gadagançylygy Bitaraplyk we Täze ýyl baýramynyň öňüsyrasynda täzeden güýçlenýär. Täze gadagançylyklaryň jikme-jikligi barada Azatlyk Radiosynyň habarçysy maglumat berýär.
Reňk babatdaky güýçlenýän gadagançylyk ulaglaryň radiator gözenekleriniň hem ak reňkde bolmagyny talap edýär.
Ýatladyp geçsek, Azatlyk Radiosy mundan ozal apreliň ahyrynda Lebap welaýatynda awtoulaglaryň gara reňkli radiator gözenekleriniň aň reňke boýalmagynyň talap edilýändigini habar berdi.
Habarçymyzyň soňky maglumatlaryna görä, geçen dynç güni, 5-nji dekabrda Polisiýanyň ýol gözegçiligi gullugynyň işgärleri ýollarda radiator gözenekleri gara reňkde bolan ençeme awtoulaglary saklap, olary Lebabyň ýol gözegçiligi boýunça welaýat gullugyna alyp gitdi.
“Welaýat GAI-niň öňi awtoulagdan doldy. Iň köp “Gazel” kysymly kiçi awtobuslar eltildi. Olary ýollarda işläp ýören ýerlerinden çykaryp, ýol gözegçiligi gullugyna alyp gitdiler” diýip, bir lebaply sürüji Azatlyk Radiosynyň habarçysyna gürrüň berdi.
Habarçymyzyň maglumatlaryna görä, Polisiýanyň ýol gözegçiligi gullugynyň welaýat bölümine eltilen ulaglaryň sany 50-den geçýär.
Bu aralykda, ýol gözegçilik polisiýasynyň güýçlendiren barlaglary sürüjileriň öz aralarynda ylalaşyp, ýollarda geçirilýän barlaglardan birek-biregi habarly etmegine alyp geldi.
Munuň netijesinde, belli-belli ugurlar boýunça kiçi awtobus gatnawlary doly kesilipdir.
Azatlyk Radiosynyň habarçysy bilen gürrüňdeş bolýan sürüjiler awtoulaglaryň öň tarapynda ýerleşýän radiator gözenekleriniň zawoddan çykanda gara reňkde öndürilýändigine ünsi çekýärler.
Türkmenistanda awtoulaglaryň reňki boýunça girizilýän talaplar, mälim bolan maglumatlara görä, kanunçylyga esaslanmaýar. Şeýle-de, häkimiýetler goýy reňkli awtoulaglaryň ak reňke boýalmagy baradaky talaplaryny dilden görkezme esasynda buýruk berýärler.
Ýekşenbe güni Lebap welaýatynda Polisiýanyň ýol gözegçiligi gullugyna eltilen ulaglaryň eýelerinden awtoulaglaryň gara reňkli gözenekleriniň gysga wagtda dessine ak reňke boýalmagy şert edip goýuldy.
“Ýol gözegçilik gullugynda polisiýa daş çykyp, ‘kimde-kim öz awtoulagynyň gözenegini häzir ak reňke boýasa, şol awtoulagy yzyna gaýtaryp berýäris’ diýdi” diýip, bir sürüji Azatlyk Radiosynyň habarçysyna gürrüň berdi.
Munuň yz ýany, awtoulaglaryny polisiýa aldyran sürüjiler dessine ak boýag tapyp, radiator gözeneklerini ak reňke boýamagyň ugruna çykýarlar.
“Her kim eline ak boýag alyp, boýag çalynýan çotga bilen ulaglarynyň gara reňkli gözeneklerini ak reňke boýap başlady” diýip, sürüji sözüniň üstüni ýetirýär.
Boýag işleri, habarçynyň maglumatlaryna görä, sürüjilere aňsat düşmedi.
“Bir sürüji boýag bilen awtoulagynyň gara reňkli gözenegini ak reňke boýady. Ýöne gözenek bir gezekde doly ak reňke boýalmady. Ak boýag gara reňki doly ýapyp bilmedi. Soňra sürüji boýagy gutaransoň, iki sagat garaşyp, ikinji boýag gutusy bilen gara gözenegi doly ak reňke boýady. Şondan soňra polisiýa işgäri ol sürüjä şahadatnamasyny gaýdyp berdi we öýüne goýberdi” diýip, bir şaýat Polisiýanyň ýol gözegçiligi gullugynda bolan wakany gürrüň berdi.
Türkmen häkimiýetleri ulaglaryň reňki bilen bagly talaplaryny resmi görnüşde döwlet media serişdeleri arkaly düşündirmeýärler.
Türkmenistanda ak reňk prezident Gurbanguly Berdimuhamedow iň eý görýän reňkleriniň bir hasaplanýar. Ýöne prezident Berdimuhamedow 2019-njy ýylyň awgustynda awtoulaglar boýunça ak reňk talabyny ýurduň yssy howa şertleri bilen düşündirdi.
Galyberse-de, Lebapda awtoulaglaryň reňki boýunça güýçlenýän talaplar Türkmenistanda 12-nji dekabrda bellenjek Bitaraplyk gününiň hem-de aýyň ahyrynda bellenjek Täze ýyl baýramynyň öň ýanyna gabat gelýär.
Mundan başga-da, Azatlyk Radiosynyň habarçylary ak reňk talabynyň ýeňil awtoulaglaryň tekeleriniň arka tarapyndaky gara reňkli palçyk sowujylary hem öz içine alýandygyny habar berýärler.
Azatlyk Radiosy Lebap welaýatynda awtoulaglaryň reňki boýunça güýçlendirilýän talaplar barada welaýat polisiýa gullugyndan kommentariý alyp bilmedi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
