Türkiýäniň prezidenti şenbe güni Türkmenistanyň paýtagty Aşgabada resmi sapara baryp, Ykdysady hyzmatdaşlyk guramasynyň 15-nji sammitine gatnaşar diýip, türk mediasy habar berdi.
Türkiýäniň Aragatnaşyk müdirliginiň anna güni çap eden beýanatynda aýdylmagyna görä, Rejep Taýyp Erdoganyň iki günlük sapary Türkmenistanyň prezidenti Gurbanguly Berdimuhamedowyň çakylygy esasynda amala aşyrylýar.
Türk lideri Aşgabatda Türkiýe-Türkmenistan gatnaşyklarynyň gerimine baha beriljek we ikitaraplaýyn hyzmatdaşlygy mundan beýläk hem ösdürmek mümkinçilikleriniň ara alnyp maslahatlaşyljak duşuşygyna gatnaşar.
Şeýle-de taraplar sebit meseleleri boýunça pikir alyşar diýip, metbugat habarynda aýdyldy.
Erdogan ýekşenbe güni geçiriljek sammite hem gatnaşar.
Ösüş üçin sebitleýin hyzmatdaşlygyň dowamy hökmünde 1985-nji ýylda Türkiýe, Eýran we Pakistan tarapyndan döredilen Ykdysady hyzmatdaşlyk guramasyna (YHG) 1992-nji ýylda Owganystan, Azerbaýjan, Gazagystan, Gyrgyzystan, Täjigistan, Türkmenistan we Özbegistan hem goşuldy.
Bu gurama söwda we maýa goýumlary boýunça hyzmatdaşlyk etmek üçin sammitleri, ministrleriň ýygnaklaryny we yzygiderli mejlis geçirýär.
Şu aralykda, wise-premýer, daşary işler ministri Reşit Meredow hökümet başlygyna 27-28-nji noýabrda Türkiýäniň prezidentiniň Türkmenistana boljak döwlet saparyna görülýän taýýarlyk işleri barada hasabat berdi.
Onuň 26-njy noýabrda geçirilen hökümet mejlisinde aaýdan sözlerine görä, Türkiýäniň prezidentiniň döwlet saparyna taýýarlyk görmegiň çäklerinde degişli Maksatnamanyň taslamasy işlenip taýýarlanyldy.
Prezident Gurbanguly Berdimuhamedow türkmen-türk gatnaşyklarynyň ýokary derejesini, okgunly ösüşini kanagatlanma bilen belläp, iki ýurduň halklaryny birleşdirýän dostluk we doganlyk gatnaşyklarynyň olaryň mäkäm binýady bolup durýandygyny nygtady diýip, TDH-nyň habarynda bellenýär.
Şeýle-de, DIM-niň ýolbaşçysy Ykdysady hyzmatdaşlyk guramasynyň XV sammitine görülýän taýýarlyk işleri barada hasabat berdi.
Türkmenistan bu sammiti 2021-nji ýylda YHG-da başlyklyk edýän döwlet hökmünde kabul eder.
Sammitiň maksatnamasy taýýarlanyldy, onuň öň ýanynda türkmen paýtagtynda birnäçe çäre, şol sanda ýokary wezipeli resmi wekilleriň duşuşygyny, YHG-a agza ýurtlaryň işewürleriniň maslahaty gçiriler.
Mundan başga, 27-nji noýabrda YHG-nyň daşary işler ministrleriniň Geňeşiniň nobatdaky mejlisini geçirmek göz öňünde tutulýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.